Панфилов ауданында «Наурыз – жасампаздық мерекесі: Жетісудың тарихи мұрасын сақтау және дінаралық диалог» атты діни бірлестік жетекшілері клубының I отырысы өтті.
Түрлі конфессия өкілдерін бір алаңға тоғыстырып, қоғамдағы бейбітшілік пен өзара құрметті дәріптейтін бұл отырыстың маңызы зор. Наурыз мейрамының рухани-мәдени құндылықтарын кеңінен насихаттау, Жетісу өңірінің тарихи мұрасын сақтауды негізге алған клуб отырысында діни бірлестік өкілдері ортақ құндылықтар мен рухани жауапкершілік туралы пікір алмасты. Дін көшбасшылары қоғамдық келісімді бірлесе нығайтудың, мәдени мұраны сақтаудың және ұлттық тәрбиенің маңыздылығына тоқталды.
Іс-шара аясында 23 діни бірлестік өкілдері Жаркент мешіті сәулет-көркем музейіне және Илия пайғамбар шіркеуіне экскурсия жасап, өңірдің тарихи-мәдени мұрасымен танысты. Сонымен қатар, Наурыз мейрамының символдық мәнін айқындайтын ағаш отырғызу акциясына қатысты.
Клуб отырысы Жетісу өңірінде конфессияаралық келісімді нығайтуға, тарихи-мәдени мұраны сақтауға және қоғамдағы рухани құндылықтарды дамытуға бағытталған маңызды бастама ретінде жоғары деңгейде өтті. Басқосу қоғамдағы бейбітшілікті, татулық пен тұрақтылықты, ұлттық құндылықтарды дәріптеуге бағытталған маңызды диалог алаңына айналды.
«Жетісу-Ақпарат»
