Ибраһим пайғамбардың әулетінен басталатын ұлық мереке Құрбан айт биыл 6-8 маусымда болады. Тарих пен тағылымды ұштастырған, адам бойындағы мейірімділікті арттырып, араздасқандарды жақындастырып, мұқтаждарға қол ұшын беруді насихаттайтын игі істің бастауы саналатын Құрбан айттың маңызы зор. Бұл мерекені атап өтудің ережесі қалыптасқан, арнайы өкілдіктер арқылы нақты шешім қабылданған. Бұл жөнінде Бейсен Құранбек атындағы Журналистер үйіне арнайы келген облыс бойынша бас имам Керімбек Дәуітов пен облыстық дін істері басқармасының басшысы Сағыныш Жаңабай айтты.
Малдың жақсысын құрбандыққа шалып, тұрмысы төмен адамдарға таратып, болмаса қонақ күтіп, үлкеннің батасын алу Аллаға жақындау («Құрбан» сөзін арбаша аударсақ «жақындау») үшін жасалған қадам. Сайып келгенде шарттарды ұстана отырып, құлшылық ниетімен мал бауыздау (діни терминдік мағынасы). Биылғы мерекеге дайындық жөнінде бас имам Керімбек Сәрсембайұлы:
– Алла қаласа, биыл 5 маусымда Арафа күні басталып, Құрбан айт мерекесі 6-8 маусымда болады. Қазақстан Мұсылмандары діни басқармасы және алыс-жақын мұсылман елдерінің ғұламаларымен пәтуа шығару орталықтарымен кеңесіп, осындай шешім қабылдады. Айт намазы облысымыз бойынша 6 маусым сағат таңғы 6.00-де оқылады. Ал мерекеге орай облысымызда 14 орын қасапхана ретінде белгіленген. Алла Тағала қасиетті Құранда: «Раббыңның разылығы үшін намаз оқы және құрбандық шал» («Кәусар» сүресі, 2-аят) деп бұйырған, – деді өз сөзінде.
Құрбан айт мерекесінде www.qurban.muftyat.kz сайты жұмыс істеп, онлайн тіркеліп, ақша аудару арқылы құрбандық шала аласыз. Ал жіберген ақшаңыз жөнінде, малдың сойылып, берілгендігі жөнінде WhatsApp мессенджері арқылы хабарлама келеді. Сайтта қой 80 мың, ешкі 50 мың, ірі қара 500 мың, түйе миллион теңге деп көрсетілген. Бұл бағаға сою, жіліктеу, пакетке салу, мұқтаждарға жеткізу, қасапшының қызметі қосылған.
Ысырапшылдыққа жол бермеу мақсатында бірқатар іс жүргізіліп жатыр. Бұл жөнінде Сағыныш Асқарұлы:
«Мерекеге байланысты аудан, қала аумағында жалпы қоғамдағы қауіпсіздікті қамтамасыз етіп, резонанстық жағдайға жол бермеу және Құрбан айтты өткізу бойынша тиісті жоспар бекітіліп, жұмыс жүргізілуде. Белгіленген орындарда малдың сатылуы мен сойылуын анықтап және ол туралы тұрғындарды алдын ала хабардар етіп, мал сою орындарындағы санитарлық-ветеринарлық нормалардың, өрт қауіпсіздігі сияқты талаптардың сақталуын қадағалап, құрбан шалудың тәртібі бағытында ақпараттар әлеуметтік желілерге жариялануда, – деді.
Серік ҚАНТАЙ
