Сенбіде әдеттегідей Талдықорғандағы коммуналдық базарда жұрттың қатары көп болды. Талдықорған қаласына жақын орналасқан елді мекендердің шаруа қожалықтары мен жекелеген тауар өндірушілер таза да экологиялық құнары жоғары өнімдерін арзан бағаға сатылымға шығарды. Ал талдықорғандықтар үшін әр сенбі мерекемен тең. Жұрттың осы қуанышын Алматы облысы әкімінің бірінші орынбасары Лаззат Тұрлашов көріп, сатушылармен де, базарға ағылған жұртпен де әңгімелесіп, бағаны бағамдап қайтты.
Коммуналдық базардағы баға қаладағы басқа сауда нүктелеріне қарағанда 20-30 пайызға арзан. Келушілер тарапынан ет, сүт өнімдеріне деген сұраныс көп. Өйткені, өзге сауда орындарында 2500-3000 теңге аралығында сатылатын жылқы еті бұл жерде 1800-2200 теңге айналасында. Бір келі сиыр етінің құны 2000 теңгеден аспайды. Жұмыртқа, құрт-май, көкөніс дейсіз бе, коммуналдық базардың әр тұсында ығы-жығы сауда жүріп жатыр. Сөзіміз дәлелді болу үшін мұнда саудаланған түрлі тауардың бағасын өзге облыстармен де салыстырып көрдік, Нәтижесінде, Талдықорғандағы баға әлдеқайда төмен екенін байқадық.
Коммуналдық базар өкілдерінің айтуынша, мұнда 300-ден астам сауда нүктесі бар. Десе де, бұл күні өз өнімін саудалуға келетіндердің саны одан әлдеқайда көп. Оның үстіне, мұнда зейнеткерлерге орын тегін ұсынылады. Осындай жақсы жағдайдан хабардар алыс аудандардағы шаруа қожалықтары да өнімін сенбі сайын осы жерге әкеліп саудалауға үйреніп алыпты.
– Аптаның басқа күндері шаруа қожалығының шаш-етектен келетін шаруасын ыңғайлаймын да, сенбі сайын ет және сүт өнімдерін коммуналдық базарға әкеліп саудалап тұрамын. Қазір өзімнің тұрақты сатып алушыларым бар. Арасында келе алмай қалсам, олар мені іздеп қалады. Бұл базардың бір тиімділігі – біз өз өнімімізді сатып бір қуансақ, тұтынушылар арзан тауар алып, екі қуанады, – дейді Ескелді ауданы, Ақын Сара ауылының тұрғыны, «Наурызбаев» шаруа қожылығының иесі Бибігүл Наурызбаева.
Базарды Лаззат Мақатұлы толық аралап шықты. Сатушылармен тілдесіп, сөреде ілулі тұрған бағаларды қадағалап, сатып алушылардың қуанышына ортақтасты.
– Коммуналдық базардағы өнімдердің арзан бағада сатылып жатқанын көрдік. Делдалсыз сауда тауар өндірушілердің еңбегін ақтайды. Арзан тауарға қол жеткізген тұтынушылар да біраз қаржысын үнемдеп қалады. Сондықтан, бұл базардағы жұмысты бұдан ары да ширатып, өз деңгейінен түсірмеу керек. Бұл қаладағы азық-түлік бағасын тұрақты ұстап, тұрғындардың жаздай істеген жұмысына орай напақасын табуға мүмкіндік береді, – деді облыс әкімінің бірінші орынбасары.
Сенбілік сауда таң атқаннан кеш батқанша бір тынған жоқ. Демек, жұрт қалауынан шыққан, сатушыны да қуантқан, бір сөзбен айтсақ, екі жаққа да тиімді сауда-саттық алдағы уақытта да жалғасын табары анық.
Қажет АНДАС
Алматы облысы
