Алматы облысының әкімі Амандық Баталовтың төрағалығымен ағымдағы өзекті мәселелер бойынша кеңейтілген жиын өткізілді. Онлайн-режимде өткен жиынға аудан, қала әкімдері қатысты. Бұл туралы Алматы облысы әкімінің баспасөз қызметі хабарлады.
Бірінші қаралған мәселе – көктемгі дала жұмыстары. Бүгінгі күнге дәнді дақылдарды себу жоспары 102%, жүгері егу 74,3%, қант қызылшасын себу 92% атқарылды. Жоспарға сәйкес басқа да дақылдар себілуде. Көктемгі егіс жұмыстарына ауа райы әзірге қолайлы.
— Алдында айтқандай, Алакөл, Қарабұлақ қант зауыттарын іске қосу үшін инвесторлармен келіссөз жүріп жатыр. Сонымен қоса егіс алқаптарының көлемін ұлғайту, ирригациялық жүйелерді жөндеу бағытындағы жұмыстарды да жалғастыра беру керек. Оған барлық аудан, қала әкімдері белсене қатысуы тиіс. Инвесторлармен бірлесіп, майлы дақылдар өңдейтін қосымша зауыттарды іске қосуды, рапс көлемін арттыруды жоспарлап отырмыз, — деді А.Баталов.
Әлеуметтік маңызды тауарларды бағасын ырықтандыру мен су тасқынының алдын алу да облыс әкімінің тұрақты назарында. Әсіресе, бірқатар аудандардағы санитарлық тазалық жұмыстары қатаң сынға ұшырады.
Облыс әкімінің бірінші орынбасары Л.Тұрлашовқа 2021-2022 жылғы жылыту маусымына дайындықты әр сенбі сайын жиын өткізіп, пысықтап отыру тапсырылды. Жылыту желісін жөндеу, қазандықтарды газға ауыстыру ісі де басты назарда болуы тиіс. Жиында ҰБТ-ны ұйымдастыру, туристік маусымның ашылуына дайындық жұмыстары да пысықталды.
Індетпен күрес шараларының барысы туралы айтылып, санитарлық-эпидемиологиялық бақылау департаментіне індеттің таралуына жол бермеу шараларын күшейту тапсырылды.
«Сарыөзек – Көктал» жолы учаскесі, «Талдықорған — Үшарал» трассасы, Балқаш көліне апаратын жол, «Алтын орда» базары аумағындағы жол, Шамалған ауылындағы темір жол өткелі сияқты инфрақұрылым мәселелері де назардан тыс қалған жоқ.
Облыс басшысы облыс орталығында, сонымен қатар, жалпы облыс көлемінде заңсыз құрылысқа жол бермеу керектігін қатаң ескертті. Салынып және жөндеуден өтіп жатқан әлеуметтік нысандардың жай-күйіне тоқталды. Олардың қатарында Балқаш ауданындағы орталық аурухана да бар. Облыс әкімі нысанның материалдық-техникалық базасын толық жаңартуды тапсырды.
— Жуырда тағайындалған аудан әкімдері, сіздерден жақсы бастамалар, барлық бағытта белсенді жұмыс күтеміз. Індет жағдайына қарамастан біз тиімді жұмысты жалғастыруымыз керек. Бұл талап барлық аудан, қала әкімдеріне қатысты. Бірде-бір мәселе шеттеп қалмасын, істің ұсақ-түйегі болмайды, — деді А.Баталов.
«ЖЕТІСУ-АҚПАРАТ»
