Қазақстан Республикасы Бәсекелестікті қорғау және дамыту агенттігінің Алматы облысы бойынша департаменті тауарлық газды бөлшек саудада өткізу нарығына талдау жүргізді. Бұл туралы «Жетісу» газеті хабарлады.
Департамент жүргізген талдау нәтижелеріне сәйкес, 2020 жылы Еңбекшіқазақ және Көксу аудандарында тауарлық газды бөлшек саудада өткізу бойынша «Gaz Trade Service» ЖШС және «BSP GROUP LTD» ЖШС тиісінше үстем жағдайға ие екендігі анықталды. Сондай-ақ, департамент талдау жүргізу кезінде аталған нарық субъектілері заңды тұлғалармен тауарлық газды бөлшек саудада өткізу шарттарын жасағанда ай сайынғы алдын ала төлем талаптарын қойғандығын анықтады.
Осылайша, «BSP GROUP LTD» ЖШС және «Gaz Trade Service» ЖШС тұтынушыны газ жеткізілімі үшін ай сайынғы алдын ала төлем шарттарында ақы төлеуге міндеттейді, ал бұл Қазақстан Республикасы Азаматтық кодексінің 488-бабының нормаларына қайшы келеді, онда абонент нақты қабылдаған энергия мөлшері үшін ғана ақы алу құқығы жазылған. Яғни, заңмен жеткізілген газ үшін алдын-ала төлем талап етуге тыйым салынады. Сондай-ақ, Қазақстан Республикасы Кәсіпкерлік кодексінің (бұдан әрі-Кодекс) 174-бабына сәйкес үстем немесе монополиялық жағдайға ие нарық субъектілерінің тиісті тауар нарығына кіруді шектеуге, бәсекелестікті болғызбауға, шектеуге және жоюға әкеп соққан немесе әкеп соғатын және (немесе) нарық субъектісінің немесе тұтынушылардың айқындалмаған тобының заңды құқықтарына қысым жасайтын әрекеттеріне (әрекетсіздігіне) тыйым салынады.
Осылайша, департамент серіктестіктің әрекеттерінде Кодекстің 174-бабының 9-тармағы бойынша Қазақстан Республикасының бәсекелестікті қорғау саласындағы заңнамасын бұзу белгілерін, атап айтқанда, контрагентке шарттың нысанасына жатпайтын, экономикалық немесе технологиялық негізсіз шарт талаптарын күштеп таңу жағдайларын байқады.
Кодекстің 199-бабының 1-тармағына сәйкес, үстем немесе монополиялық жағдайды теріс пайдалану белгілері болған кезде осы кодекстің 174-бабының 1) тармақшасында көрсетілген белгілерді қоспағанда, монополияға қарсы орган нарық субъектісіне өзінің әрекеттерінде (әрекетсіздігінде) Қазақстан Республикасының бәсекелестікті қорғау саласындағы заңнамасын бұзу белгілерінің бар екендігі туралы тергеп-тексеру жүргізбестен хабарлама жібереді.
Осыған байланысты департамент жоғарыда аталған нарық субъектілеріне бәсекелестікті қорғау саласындағы заңнаманы бұзудың үстем немесе монополиялық жағдайды теріс пайдалануды тоқтату, яғни, келісімшартта контрагентке экономикалық немесе технологиялық негізсіз келісімшарттың тақырыбымен байланысты емес талаптарды алдын-ала төлем жасауды көздейтін тармақты алып тастау арқылы жою және Кодекстің 174-бабының 9-тармағында көзделген әрекеттерді алдағы уақытта болдырмау туралы хабарлама жіберді.
Хабарламаларды орындау мерзімі оны алған күннен бастап күнтізбелік отыз күнді құрайды.
«ЖЕТІСУ-АҚПАРАТ»
Сурет ғаламтордан алынды
