ҚР Премьер-Министрі Асқар МАМИННІҢ төрағалығымен инвестициялық штабтың отырысы өтті. Онда Президент жанындағы реформалар жөніндегі жоғары кеңес тарапынан таныстырылған инвестицияларды басқару бойынша жаңа тәсілдер қаралды. Селекторлық режимдегі жиынға Алматы облысының әкімі Амандық БАТАЛОВ қатысты.
Қазақстанның 2025 жылға дейінгі Ұлттық даму жоспары мен «Nur Otan» партиясының сайлауалды бағдарламасында негізгі капиталға салынған инвестициялар көлемін 2025 жылы жалпы ішкі өнімнің 30 пайызына дейін, шетелдік инвестициялар көлемін 30 миллиард долларға дейін жеткізу мақсат етілген. ҚР Ұлттық экономика министрі Әсет Ерғалиев аталған көрсеткіштерге қол жеткізу үшін инвестицияларды таргеттелген және проактивті тарту бойынша жүйелі шаралар іске асырылатынын атап өтті. Инвестициялар тарту үшін агроөнеркәсіптік кешен, туризм, инфрақұрылым, машина жасау, фармацевтика, ТМК, мұнай химиясы, IT, білім беру және қосылған құн деңгейі жоғары басқа да салалар басым секторлар болып айқындалды.
Келесі кезекте сөз алған ҚР Сыртқы істер министрі Мұхтар Тілеуберді 32,4 трлн.теңге сомасына 1600-ден астам жобадан тұратын пул құрылғанын айтты. Шетелдік инвестицияларды тарту үшін ҚР СІМ-нің шетелдік мекемелері үшін үш жылдық елдік бағдарламалар әзірленіп, қабылданды. Әрбір бағдарлама белгілі бір елдің экономикасының, құрылымының ерекшелігін ескере отырып, оның таргеттелетін салалары мен компанияларын көрсетеді.
ҚР Ауылшаруашылығы министрі Сапархан Омаров бес жыл ішінде АК саласында жалпы сомасы 4,1 трлн.теңгеге 400-ге жуық инвестициялық жобаны іске асыру жоспарланып отырғанын хабарлады. Бұл өз кезегінде 2025 жылға қарай жалпы ауылшаруашылығы өнімінің көлемін 1,3 есе, ал экспортты 2 есе ұлғайтуға мүмкіндік береді. 2023 жылға қарай ішкі нарықты негізгі әлеуметтік маңызы бар азық-түлік тауарлары бойынша отандық өніммен молықтыру қамтамасыз етілетін болады.
Жиында Қарағанды облысының әкімі Жеңіс Қасымбек, Қостанай облысының әкімі Архимед Мұхамбетов инвестиция тарту бойынша атқарылып жатқан жұмысты таныстырды. Стратегиялық жоспарлау және реформалар агенттігінің төрағасы, «Астана» халықаралық қаржы орталығының басқарушысы Қайрат Келімбетов шетелдік және отандық инвесторлармен жұмыс істеудің жаңа бағыты туралы сөз қозғады.
Асқар Ұзақбайұлы инвестицияларды басқару бойынша жаңа тәсілдерді әлі де егжей-тегжейлі қарауды тапсырып: «Жаңа инвестициялық циклды қалыптастыру іскерлік белсенділікті қалпына келтірудің және экономиканың одан әрі сапалы өсуінің басты шарты болып табылады», – деді.
Жиын аяқталған соң облыс әкімі Амандық Баталов жауапты тұлғаларға инвестиция тарту тұрғысында тиісті тапсырма берді.
Мәулен ӘНЕРБАЙ
