Заң шығару қызметіне қатысқан облыстық кәсіпкерлер палатасы өткен жылы жергілікті атқарушы органдардың 163 жобасын қарады.
Сараптамалық жұмыс кәсіпкерлік субъектілерінің құқықтары мен заңды мүдделерін қорғау, артық әкімшілік реттеудің алдын алу, сондай-ақ, аймақта бизнесті жүргізу жағдайына теріс әсер етуі мүмкін нормалардың қабылдануына жол бермеу мақсатында жүргізілді. Нормативтік-құқықтық актілердің 71 жобасы бойынша ескертусіз сараптамалық қорытындылар берілді. Бұл олардың қолданыстағы заңнама талаптарына сәйкестігін және кәсіпкерлік қызметті шектейтін нормалардың жоқтығын көрсетеді.
Палата 42 жоба бойынша әкімшілік кедергілерді, құқықтық қайшылықтарды, сондай-ақ, артық талаптар мен бизнес-қоғамдастыққа қосымша жүктемені көздейтін нормаларды жоюға бағытталған ескертулер мен ұсыныстар енгізді. Тағы 47 жоба кәсіпкерлік субъектілерінің мүдделерін қозғамаған және міндетті сараптамалық сүйемелдеуге жатпаған. Талдау кезінде 74 жоба мемлекеттік басқару саласына бағытталған.
Құжаттардың басым бөлігі тұрғын үй-коммуналдық шаруашылық мәселелеріне қатысты болды. Одан кейін салық салу, агроөнеркәсіптік кешен, әлеуметтік қорғау және қамтамасыз ету, жер қатынастары мен туризм. Кәсіпкерлер палатасы НҚА жобаларын сараптамалық бағалауды және мемлекет пен бизнес мүдделерінің теңгерімін сақтауға бағытталған ұсыныстарды әзірлеуді қамтамасыз ете отырып, тұрақты негізде қолайлы жағдай туғызды.
Кәсіпкерлердің құқықтарын қорғау және әкімшілік кедергілерді азайту бөлімінің жетекші сарапшысы Нұрлан Мамаев жүргізіліп отырған жұмыс әкімшілік жүктемені азайтуға, қабылданатын нормативтік-құқықтық актілердің сапасын арттыруға және облыста кәсіпкерлікті дамыту үшін қолайлы жағдайлар жасауға ықпал ететінін айтты.
А. БАЙЖҰМАҚЫЗЫ
