Алматы облысы бойынша тексеру комиссиясы биылғы аудит объектілерінің тізбесіне сәйкес, облыстық білім басқармасы және оған қарасты мекемелерге жүргізілген аудиторлық шаралардың қорытындысын қарады.
Отырысты облыстық тексеру комиссиясының төрағасы Мейрам Мұсаев жүргізіп, тексеру қорытындысының жай-жапсарын комиссия мүшесі Жарқынбек Үсенбаев таныстырды. Баяндамада айтылған кемшіліктердің себеп-салдары және орындалу барысы туралы облыстық білім басқармасы басшысының орынбасары Гүлсара Исағұлова мен экономика, бухгалтерлік есеп және есеп беру бөлімінің басшысы Айгүл Маралбаева түсіндіріп өтті.
Баяндамашының айтуынша, облыстық тексеру комиссиясы ағымдағы жылы жүргізген мемлекеттік аудитпен 172643993,5 мың теңге бюджет қаржысы қамтылып, жалпы сомасы 707351,8 мың теңге заңбұзушылық анықталған. Оның ішінде 340463,5 мың теңге қаржылық заңбұзушылықтар болса, 366889,3 мың теңге тиімсіз жоспарланған және тиімсіз пайдаланылған бюджет қаражаты есебінде. Бүгінгі күнге дейін бюджет есебіне жалпы сомасы 32928,1 мың теңге немесе 57%-ы өндірілсе, 278894,6 мың теңге немесе 97,3%-ы бухгалтерлік есеп бойынша қалпына келтірілген. Бюджет және өзге де заңнамалардың бұзылуына жол берген мемлекеттік аудит объектісінің 112 қызметкері тәртіптік жауапкершілікке тартылыпты.
Анықталған заңбұзушылықтар бойынша мемлекеттік аудит объектілерінің лауазымды тұлғаларына әкімшілік жауапкершілік қарастыру мақсатында облыс бойынша ішкі мемлекеттік аудит департаментіне жалпы саны 75 материал жолданып, 56-сы бухгалтерлік есепті дұрыс жүргізбеген үшін, 19-ы мемлекеттік сатып алу заңдарын бұзғаны үшін жергілікті бюджет есебіне 5650,4 мың теңге айыппұл өндірілген.
Отырыс барысында мұнан өзгеде ескеруге тиісті кемшіліктің бар екендігі белгілі болды.
– Аудиттік тексеріс барысында тиімсіз пайдаланылған және заңбұзушылыққа жол берген Қапшағай қаласындағы балалар шығармашылығы және жазғы демалыс орталығы 27089,1 мың теңге, Есік қаласындағы №6 облыстық психологиялық-медициналық, педагогикалық кеңес беру орталығы 397 мың теңге, Көксу политехникалық колледжі 135 мың теңге, Панфилов ауданы бойынша жергілікті бюджет есебі бойынша өндірілетін 1869,0 мың теңге көлеміндегі қаржыны бюджетке толық қайтармай отыр. Ал, Жыланды ауылындағы дарынды балаларға арналған лицей-интернатының 7837,0 мың теңге құнға ие ғимараты әлі қолданысқа берілмей келеді, – деді баяндамашы Жарқынбек Орынбасарұлы.
Баяндама аяқталған соң Мейрам Мырзанұлы бастаған комиссия мүшелері облыстық білім басқармасы өкілдерінен өздерін толғандырған сұрақтар бойынша нақты жауап алды. Белгілі болғандай, облыста 40-қа жуық колледж болса, оның 14-нің директоры зейнет жасындағылар. Әрине, зейнетке шыққаннан кейін бір, екі жыл жұмыс істеген болса, оны түсінуге болар еді. Алайда, алды он жылдан астам уақыт бір орында жайланып отырғандар жастарға орын беруге асықпайтын сияқты. Сондай-ақ, кейбір елді мекендерде тұрғындардың оқу жасына дейінгі балаларын толық қамтитын балабақша бар болса да, мектеп жанынан шағын орталықтар ашуға сұраныс берілген.
Бұл, әрине, бюджетке салмақ түсірумен қатар, қаржының тиімсіз пайдалануға себеп болады. Бұл да білім басқармасы тарапынан ескерілетін келеңсіздіктің бірі. Ал білім беру мекемелеріндегі қызметшілерге «артық төленген жалақы» мен жетім, жартылай жетім балаларға төленетін жәрдемақының уақытында берілмей жататыны бар. Білім беру мекемелерін қысқы жылыту маусымында қатты және сұйық отынмен қамтамасыз ету барысында да шешімін күткен мәселе көп. Комиссия мүшелері тарапынан қойылған осы және басқа да сұрақтарға Гүлсара Тастандықызы жауап берді.
– Өткен жылы білім мекемелерін қатты және сұйық отынмен қамтамасыз ету барысында біраз қиындықтар кездесті. Өйткені, алдын ала сатып алу шарты жасалған жауапты мекеме өз міндетін толық атқармағандықтан сот арқылы келісімшартты жойып, басқа сенімді тасымалдаушы мекемемен келісімшартқа отырдық. Осыған байланысты қатты және сұйық отынды тасымалдау уақыты кешіккенімен бұрыннан бар отын қорының көмегімен жылыту маусымынан қиналай шықтық. Ал Шелек политехникалық колледжіндегі 5 жетім балаға жәрдемақы төлеу мәселесі карантинге байланысты туындаған еді. Қазір ол балаларға төленуге тиісті қаражат толық өз банк шоттарына аударылды. Расында, облыстық білім басқармасына қарасты мекемелерде жалпы 16 зейнеткер басшылық орында отыр. Оның 11-і колледж директоры, 5-еуі облыстық түзету мекемелерінің басшылары мен мамандандырылған лицейлердің директорлары. Олар бүгінде келісімшарт бойынша жұмыс істеуде. Осы орайда облыстағы үш колледж директорының орны бос тұрғанын да айта кетейік. Бұл мәселені биылғы оқу жылы аяқталғаннан кейін толық шешім етеміз, – деді ол.
Облыстық комиссия білім беру саласын аудиттік тексеру барысында бұдан өзге заңбұзушылық анықталмағанын жеткізді. Айтылған кемшіліктер кезең-кезеңімен реттелетініне жиын соңында комиссия мүшлері сенім білдірді.
Қажет АНДАС
Алматы облысы
