Бүгінде Талдықорғанда шағын өндіріс цехын ашып, кәсібін дөңгелетіп отырған еңбеккерлер жетерлік. Солардың бірі Өтенай ауылында кондитерлік цех ашып 7 ауыл тұрғынын тұрақты жұмыспен қамтып отырған жеке кәсіпкер — Еркетай Рахатаев. Ел арасында отандық өнімге сұраныс жақсы.
Еркетай Рахатаевз «Ауыл аманаты» бағдарламасына қатысып, төмен пайызбен 8 миллион теңге несие алып, цехқа керекті 3 үлкен пеш, тоңазытқыш және қамыр илегіш техникаларын сатып алған. Аспаздық салада жоғары білімі бар азаматтың әр ісі жоспарлы.
-Өткен жылы «Ауыл аманаты» бағдарламасына өтінім берген болатынмын. Жобамды мақұлдап, несие алдым. Соның арқасында керекті техникалармен цехты қамтамасыз еттім. Дәл осындайн бағдарламалар жеке кәсіпкерлерге үлкен қолдау. Ол дегеніңіз шағын және орта бизнес саласы дамып, тұрақты жұмыс орындары көп ашылады деген сөз, — деді жеке кәсіпкер.
Тәтті-дәмдіні пісіретін цехта 20-дан астам түрлі пішінді пірәндік дайындалады. Оларды Талдықорғаннан бөлек, Көксу, Ескелді аудандары мен Текелі қаласының дүкен сөрелерінен сатып алуға болады. Айта кетейік, кондитерлік цех күніне 200 келіден астам пірәндік шығарады.
«ЖЕТІСУ-АҚПАРАТ»
