Облыстық кәсіпкерлер палатасында облыстық мәслихаттың экономика, бюджет, құқықтық тәртіп, сыбайлас жемқорлыққа қарсы күрес, депутаттық өкілеттіктер мен этика, ауылшаруашылығы, жер қатынастары, ветеринария және экология, қоғамдық кеңестің аграрлық мәселелері бойынша тұрақты комиссиясының бірлескен отырысы өтті.
Облыстық мәслихат хатшысы Жанболат Жөргенбаевтың төрағалығымен өткен жиында бірнеше мәселе қаралды. Алдымен аймақтың өткен жылға арналған бюджетінің орындалуы мен тиісті кезеңге арналған әлеуметтік-экономикалық даму болжамында қабылданған өңірдің салық-бюджет саясатының негізгі бағыттарының іске асырылу барысы талқыланды.
Белгілі болғандай, аймақтың өткен жылға арналған бюджетінің кіріс және шығыс жоспары 586 347,5 млн.теңгені құрап, оның ішінде меншікті облыстық бюджеттің кіріс бөлігінің жоспары жыл басында 494 316,9 млн.теңге болып бекітілсе, жыл барысында 5 рет нақтыланып, 13 рет түзету енгізілген. Осылайша, бюджет көлемі 649 509,2 млн.теңгені құрап, 155 192,3 млн. теңгеге өскен.
Облыстық бюджет түсімдері 99,8 пайызға орындалып, оның ішінде меншікті кірістер 34 547,6 млн.теңгеге жоспарланып, нақты 38 873,9 млн.теңге түсім түскен. Жоспардан тыс түскен түсім көлемі 4 326,4 млн.теңгені құрайды. Сондай-ақ, биыл аймақта орын алып отырған суармалы егістікті суарудың проблемалары мен су пайдалану тарифтері, ауылшаруашылығы өндірушілерін субсидиялауды ұйымдастыру ісінде орын алып отырған кем-кетіктер мен оларды шешу үшін жергілікті атқарушы органдармен қолданып отырған шаралар, Іле ауданы Жетіген ауылдық округі Қайрат ауылының әкімшілік бағыныстылығын өзгерту мәселесі сөз болды.
Отырыс барысында облыста жергілікті мемлекеттік-жекешелік әріптестік жобаларының орындалуы мен облыстық мәслихаттың алдыңғы жылғы 16 шілдедегі «Іске асырылуы жоспарланатын жергілікті мемлекеттік-жекешелік әріптестік жобаларының тізбесін бекіту туралы» № 49-253 шешіміне өзгеріс енгізілді.
Облыстық экономика жəне бюджеттік жоспарлау басқармасының басшысы Ж.Əмірхановтың айтуынша, 2016-2020 жылдары облыс бойынша жалпы сомасы 64,4 млрд.теңгеге 40 МЖӘ (мемлекеттік-жекешелік әріптестік) шарты жасалып, онда тартылған инвестициялардың мөлшері 35,4 млрд.теңгені құраған. Барлығы 25 нысан пайдалануға берілген, оның ішінде 3 балабақша, 2 мектеп, 4 дене шынықтыру-сауықтыру кешені, 3 әкімшілік ғимарат, 5 денсаулық сақтау нысаны, 7 сервистік-дайындау орталығы және 1 әлеуметтік қорғау объектісі бар. Өткен жылы жалпы сомасы 10,5 млн. теңгеге 10 жоба іске асырылған, оның ішінде 4 жоба мемлекеттік міндеттемелерсіз орындалған.
Білім беру саласында мемлекеттік міндеттемелерсіз Іле ауданы Ащыбұлақ ауылдық округінде мектепке дейінгі білім беру қызметін көрсету бойынша 400 орынды балабақшаларды пайдалану бағытында 2 шарт жасалған. Халықтың әлеуметтік-тұрмыстық жағдайын жақсарту үшін тұрғын үй-коммуналдық шаруашылығы саласында газбен жабдықтау бойынша 5 жоба іске асырылған.
Басқосуда сондай-ақ, форвардтық сатып алуға қатысатын өнім берушілердің тізімін қарап, бекіту жөніндегі Үйлестіру кеңесі мен облыс бойынша сыбайлас жемқорлыққа қарсы іс-қимыл мәселелері жөніндегі өңірлік ведомствоаралық комиссиясының дербес құрамы бекітілді. Бұған қоса, жанама орман пайдалану үшін тарифтерді және мал жаюдың нормаларын қайта қараудың маңыздылығы назарға алынып, қоршаған ортаны қорғау мен табиғат пайдаланудың жай-күйi әңгімеленді.
Айгүл БАЙБОСЫНОВА
Алматы облысы
