Түрікменстанға ресми сапармен барған Қазақстанның Сыртқы істер министрі Ермек Көшербаевты Президент Сердар Бердімұхамедов қабылдады. Тараптар екі ел арасындағы стратегиялық серіктестікті нығайту, өңірлік ынтымақтастықты тереңдету және XXI ғасырда Орталық Азияны дамытуға бағытталған тарихи шарттарды талқылады, – деп хабарлайды 7-su.kz ақпараттық порталы.
Кездесу барысында Қазақстан Президенті Қасым-Жомарт Тоқаевтың жылы лебізі жеткізілді. Министр Ермек Көшербаев Астананың тату көршілік, өзара құрмет және стратегиялық серіктестік рухындағы қазақ-түрікмен ынтымақтастығына ерекше мән беретінін жеткізді. Президент Сердар Бердімұхамедов екі мемлекеттің экономикалық және саяси байланыстары оң серпінмен дамып келе жатқанын атап өтті. Саясаткерлер жоғары деңгейде қол жеткізілген уағдаластықтардың іске асырылу барысын саралап, Орталық Азиядағы бейбітшілік пен тұрақтылықты нығайту жолдарын пысықтады.
Тараптар өңірлік және халықаралық күн тәртібіндегі өзекті мәселелерді талқылап, көпжақты форматтар аясындағы өзара іс-қимылды жоғары бағалады. Іс-шараның басты нәтижесі – XXI ғасырда Орталық Азияны дамыту мақсатындағы Достық, тату көршілік және ынтымақтастық туралы шартқа қол қойылуы. Аталған құжат өңірлік ынтымақтастық пен орнықты дамудың жаңа кезеңіне жол ашады. Мемлекетаралық қарым-қатынастың мұндай деңгейі экономикалық әлеуетті арттырып, сауда-саттық байланыстарын нығайтуға мүмкіндік береді.
Қазақстан мен Түрікменстанның серіктестігі – Орталық Азиядағы қауіпсіздік пен дамудың кепілі. Екі елдің ортақ мақсаттары, географиялық жақындығы және тарихи байланыстары жаңа мүмкіндіктер ашады. Мемлекетаралық келісімдер саяси сенімді арттырып, халықтар арасындағы достықты нығайта түспек. Стратегиялық әріптестіктің жаңа деңгейі өңірдегі тұрақтылықты сақтауға және экономикалық интеграцияны тереңдетуге серпін бермек.
