Сарқан ауданын енді Ғалымжан Маманбаев басқаратын болды. Оның кандидатурасын аудан активіне таныстырған Жетісу облысының әкімі Бейбіт Исабаев бұл таңдау ауданның экономикалық әлеуетін көтеріп, әлеумет жағдайын жақсарту үшін жасалғанын жеткізді.
Аудан әкімінің орынтағына жайғасқан Ғалымжан Қанатұлы өңір жұртшылығына етене таныс. Ұзақ жыл аудан әкімінің орынбасары болып қызмет атқарған. Өңірдің барлық жағдайынан хабары бар және осы аудандағы елдің жайын, жұрттың хал-ахуалын жақсы біледі. Әрине, аудан басшылығына сол өңірдің өткені мен бүгінін, тұрғындардың талап-тілегі мен болашақ арманын назарда ұстайтын, елді береке-бірлікке ұйыстыра білетін адамның келгені көптеген мәселенің оң шешілуіне ықпал етеді.
– Сарқан аудандық мәслихатының кезектен тыс сессиясында депутаттар бірауыздан Ғалымжан Маманбаевтың кандидатурасын мақұлдады. Ежелгі Қойлық қаласының тумасы Ғалымжан Қанатұлы ұзақ жылдық тәжірибесі бар білікті маман. Сондықтан аудан тізгінін мығым ұстап, жетістіктерге жетелейтініне сенемін. Бәріңіз бірлікте, селбесіп жұмыс атқарасыз деген ойдамын, – деді облыс басшысы.
Келесі кезекте сөз алған жаңа әкім Қазақстан Республикасы Президентінің Жолдауында алға қойылған тапсырмаларды толық орындап, ел сенімінен шығатынын жеткізді.
Жаңа әкімді тағайындауға аудан активі, зиялы қауым өкілдері, ақсақалдар қатысты. Сол қатарда Сарқан ауданын 7 жыл басқарған Талғат Өмірәлиев, Сарқан ауданы ақсақалдар кеңесінің төрағасы Қадыл Жанасбеков, Сарқан аудандық аналар кеңесінің төрайымы, қоғамдық кеңестің мүшесі Гүлшарбан Қалиева, Сарқан ауданының Құрметті азаматы Мейрамғали Ғалиасқаров жаңа әкімнің азаматтық, жауапкершілік, біліктілік қасиетін жоғары бағалап, жылы лебізін білдіріп, алдағы жұмысына сәттілік тіледі.
Осыдан кейін облыс әкімі көпшілікке аймақтағы жол жөндеу, білім беру, денсаулық сақтау, мәдениет, туризм, жұмыспен қамту, басқа да салалар бойынша атқарылып жатқан жұмыстар мен алдағы жоспарлар туралы айтып шықты. Сондай-ақ, орын алған кемшіліктерді де назардан тыс қалдырмады. Сол қатарды қант қызылшасын өсірудегі көрсеткішті жоғарылату керектігін тапсырды. Сонымен қатар, елді мекендерді газдандырудағы сылбырлық, интернет желісінің қолжетімсіздігі де айтылды. Бірнеше ауылдағы орта мектептерге күрделі жөндеу жұмысын жүргізудің қажеттілігі де көтерілді.
Биыл облыстың бірнеше ауданында 100-ге жуық мұғалімнің жалған дипломмен жұмыс істегені анықталды. Соның тең жарымы Сарқан ауданының педагогтары. Осы мәселені ортаға салған облыс басшысы аудандық білім бөлімі басшысынан туындаған мәселенің жай-жапсарын сұрап, жауапты тұлғалардың жауапкершілігін қарастыруды тапсырды. Сол қатарда жасөспірімдердің қылмысы да назардан тыс қалмады. Соңғы екі аптаның ішінде Жетісу облысында жасөспірімдер арасында орын алған 4 суицид жағдайының екеуі Сарқанда болған. Облыс басшысы осы жағдайдың туындауының себеп-салдарын анықтауға қатысты тапсырма жүктеді. Соңында жаңадан тағайындалған аудан әкіміне тиісті тапсырма берді.
Аудан әкімін тағайындау салтанатынан кейін облыс басшысы бірнеше нысанды аралап көрді.
Естеріңізде болса, облыс әкімінің Сарқан ауданы тұрғындарымен өткен жолғы кездесуінде облыстық зерде бұзылыстары бар балаларға арналған арнайы интернат-мектебінің педагогы Гүлбира Таева облыс басшысын білім шаңырағына барып, жағдайды бағамдап қайтуға шақырған еді. Сол жолы уақыт тапшылығынан бұл өтінішті орындай алмаған облыс әкімі осы жолы аталған интернат-мектептің жағдайымен танысып шықты.
Расында, 1962 жылы салынған ғимаратта бүгінде 50-ден аса бала тәрбиеленіп жатыр. Бірақ оқыту базасы заман талабына сай емес. Облыс әкімі педагогтардың ұсыныс-тілегі бойынша білім ордасын қайта жаңғыртуға тапсырма берді. Сонымен бірге, облыс басшысы Сарқан аудандық балалар мен жасөспірімдер спорт мектебінің футбол алаңы мен қыстық спортзалына жүргізіліп жатқан жөндеу жұмысының жобасымен танысты.
Қажет АНДАС
Сарқан ауданы,
Жетісу облысы
