Талдықорған өнеркәсіптік индустрия және жаңа технологиялар колледжі республика бойынша «Жас маман» жобасына енгізілген 180 колледждің бірі.
Жобаға «Дәнекерлеу ісі» мамандығы бойынша қатысып отыр. Бүгінгі күнде республикалық бюджеттен колледжге 281 607 902 теңге мөлшерінде қаражат бөлініп, жоба бойынша биыл алынатын құрал-жабдықтар тізбесі әлеуметтік серіктес кәсіпорындармен пысықталып, жобаның операторы коммерциялық емес «Талап» АҚ-ның мамандарымен келісіліп, техникалық ерекшеліктері облыстық әкімшіліктің мемлекеттік сатып алу басқармасына портал арқылы ашық конкурсқа қою үшін тапсырылды.
Сатып алу үшін жоспарланған құрал-жабдықтар тізбесі 21 атаудан тұрады. Атап айтсақ, олар: соңғы үлгідегі дәнекерлеушінің жұмыс орнының жабдықтары, қолмен доғалы дәнекерлеу инверторлары, аргонмен дәнекерлеу, жартылай автоматтандырылған, автоматтандырылған дәнекерлеу аппараттары, сандық бағдарламамен басқарылатын плазмалық кесу, құбырларды орбиталық кесу және дәнекерлеу, құбырларды ию станоктары, дәнекерленетін конструкцияларды құрастыруға арналған 3D столдар, дәнекерленген жіктердің сапасын тексеруге арналған аспаптар, ауаны тазарту қондырғылары. Сонымен қатар, білім алушыларды өндірістік оқытудың алдында теориялық білімдерін тәжірибемен ұштастыру, қолдарын машықтандыру мақсатында виртуалды дәнекерлеу тренажерлары алынады.
«Жас маман» жобасына жергілікті бюджеттен республикалық бюджеттің 10 пайызын құрайтын қосымша қаражат бөлінді. Аталған қаражат шеберханалар мен құрал-жабдық орнатылатын алаңдарды ағымды жөндеуден өткізуге және өндірістік оқытуды ұйымдастыруға қажетті қосалқы құралдарды алуға жұмсалады.
«Жас маман» жобасы – өңірдегі кәсіптік білім берудің сапасын, кәсіпорындардағы мамандардың біліктілігін арттыруға үлкен сеп. Сондай-ақ, жас мамандар арасында республика деңгейінде өткізілетін WORLDSKILLS KAZAKHSTAN чемпионатына дайындықты арттыруға негізделген жоба болғандықтан бөлінген қаражатқа алынатын жабдықтар түлектеріміздің еңбек нарығында жаңа биіктерден көрінуіне көп көмек болары сөзсіз.
Т. Долаев,
Талдықорған өнеркәсіптік индустрия және
жаңа технологиялар колледжі директорының орынбасары
