«Алакөл Желтоқсан ардагерлері» республикалық қоғамдық бірлестігі 1986 жылғы Желтоқсан көтерілісіне қатысқан азаматтардың ерлігі мен елдік ұстанымын ұлықтап, тарихи жадты жаңғырту бағытында жұмыс істеп келеді. Бірлестік қайырымдылық шараларын тұрақты өткізіп тұрады.
Биыл Көксу ауданы Мұқаншы ауылдық округінің орталығы Көксу ауылында тұратын Ербол Әбілмажіновтің отбасына қайырымдылық көмек көрсетті. Бұл шаңырақта тоғыз бала өсіп келеді. Жақында ғана балалардың анасы өмірден өтіп, отбасының барлық жауапкершілігі жалғыз асыраушы – отағасының мойнына түскен. Сонымен бірге бұл үйде 90 жасқа келген, көру қабілетінен айырылған қарт әже де тұрады.
Бірлестік төрайымы Ләззат Мақатқызы бұл шараның мәні терең екенін атап өтті.
– Бұл отбасының жағдайын естіген соң қарап отыра алмадық. Қайырымдылық – тек материалдық көмек емес, қиын сәтте адамның жалғыз емес екенін сезіндіру, жанға демеу болу, үміт сыйлау. Бүгінгі игі іске бірлестіктің Жетісу, Алматы, Ақтөбе облыстары мен Алматы қаласындағы өкілдері атсалысты. Алдағы уақытта да мұндай қайырымдылық шаралары жалғасын табады, – дейді Ләззат Мақатқызы.
Отбасының үлкен ұлы Әрсен Әбілмажінов көрсетілген көмекке ризашылығын білдірді. Оның айтуынша, бауырлары колледжде, мектепте оқиды, балабақшаға баратындары да бар.
– Біз анамыздың аманатына адал болып, бауырларымыздың бір-бірінен ажырамай, жақсы азамат болып өсуін қалаймыз. Ауыл әкімдігі тарапынан да қолдау көрсетіліп тұрады. Мектептегі бауырларым жазғы лагерьге тегін барады, ыстық тамақпен қамтылған. Оқу жылы басталғанда киім-кешек, оқу құралдары жағынан көмек беріледі. Бүгін арнайы келіп, жағдайымызды сұрап, көмек көрсеткен «желтоқсаншы» ағай-апайларға отбасымыздың атынан алғыс айтамын, – дейді Әрсен Әбілмажінов.
Бұл отбасы бүгінде Көксу ауылындағы жалдамалы үйде тұрып жатыр. Ай сайын 7 мың теңге көлемінде жалдау ақысын төлейді. Алайда тоғыз баланың «бір күні осы үйден айырылып қаламыз ба?» деген алаңдаушылығы да жоқ емес. Осы мәселеге қатысты заңгер Лязат Жапашева баспананы жекеменшікке беру мүмкіндігін заң аясында қарастыруға болатынын айтты.
– Бұл үй Кеңес одағы кезінде салынған ескі баспана. Сондықтан отбасының әлеуметтік жағдайын, балалардың мүддесін және үйдің нақты жай-күйін ескере отырып, мәселені жеке тәртіппен қарастыруға негіз бар. Аудандық қоғамдық кеңес мүшелері, мәслихат депутаттары, балалар құқығын қорғайтын ұйым өкілдері және жауапты мекемелер ортақ қорытындыға келсе, аудан әкімдігінің қаулысы арқылы баспананы отбасының меншігіне беру мәселесін заң аясында шешуге болады, – деді заңгер.
Қайырымдылық акциясына Мұқаншы ауылдық округінің әкімі Мұхит Мамыр да қатысып, отбасының жағдайы ауылдық әкімдіктің тұрақты назарында екенін жеткізді. Шара барысында айтылған ұсыныстарды тиісті орындарға жеткізіп, оң шешім табуына ықпал етуге тырысатынын білдірді.
Қажет АНДАС
Мұқаншы ауылдық округі,
Көксу ауданы
