Талдықорған қаласындағы №28 ІТ мектеп-лицейінде 5-10-сынып оқушылары арасында «Оқуға құштар мектеп» акциясы аясында «Ең үздік оқырман» байқауының жеңімпаздары марапатталды. Негізгі мақсат – әдебиетті кеңінен насихаттап, баланың оқуға құштарлығын ояту.
Бұл жобаның жүзеге асып келе жатқанына 3 жыл болды. Мектеп-лицейдің негізін қалаушы Раушан Құрманғалиева болса, бүгінде Арай Шарықбаева да бірлесе жұмыс істеп жатыр. Байқауға қатысушылар бастапқыда «Балалар әдебиеті» жанры бойынша сүйікті авторының шығармасын таныстырып, оны 3 минут ішінде айтып шығу керек. Ал «Шығармашылық шеберлік» кезеңінде оқыған кітабының идеялық мазмұнын, өзіндік ойын айтып, таныстырылым немесе буктрейлер жасауы қажет.
Жарысқа қатысушылардың арасынан 6 «Г» сыныбының оқушысы Руслан Күлімхан Сайын Мұратбековтің «Жусан иісі» әңгімесін алып, оны жан-жақты талдап, мазмұнына терең үңілуге тырысқан. Мысалға, жусанның елімізде 81 түрі өсетіндігіне тоқталып, оның түркі жұрты үшін кие мен қасиетке ие екенін айтады. Оқушы әңгімедегі негізгі тақырыптардың бірі – отбасы құндылығы екенін саралай келе Аянның тағдырына тоқталады. «Үздік оқырман» байқауы мектеп-лицейде дәстүрлі түрде жалғасып, әлі талай баланың кітап оқуына үлес қоспақ.
ӨЗ ТІЛШІМІЗ
