Биыл Дінмұхамед Қонаев атындағы орта мектепте кітапханашы болып еңбек етіп жүргеніме 10 жыл. Осы уақыт ішінде мектеп кітапханасы оқырмандардың білім алуына, кітап оқуға деген қызығушылығын қалыптастыруға және рухани дамуына қосатын үлесінің зор екеніне көз жеткіздім.
Біздің мектеп – қазақ және орыс тілдерінде білім беретін ірі оқу ордасы. Кітапхана қорында 11 мың 242 оқулық бар. Оқушыларды сапалы оқу әдебиеттерімен қамтамасыз ету – кітапхана жұмысының басты бағыттарының бірі. Электронды оқулықтарды таңдау барысында бастауыш сынып мұғалімдері бірнеше жылдан бері «Алматы кітап» баспасының оқулықтарына басымдық беріп келеді. Себебі бұл баспаның оқулықтары мазмұны жағынан жүйелі, тілі жеңіл, тапсырмалары түсінікті әрі оқушылардың жас ерекшеліктеріне толық сәйкес келеді. Әсіресе 1-4-сыныптарға арналған ақпараттық-коммуникациялық технологиялар бойынша электрондық оқулықтар оқу процесінде тиімді қолданылып, оқушылардың цифрлық сауаттылығын дамытуға оң ықпалын тигізуде.
Кітапхана қорында «Алматы кітап» баспасынан жарық көрген көркем әдебиеттер де жеткілікті. Бұл кітаптар оқушылардың оқу мәдениетін қалыптастырып, дүниетанымын кеңейтіп, шығармашылық қабілеттерін дамытуға мүмкіндік береді.
Кітапхана – мектептің ең белсенді мәдени-білім беру орталықтарының бірі. Мұнда «Кітап – білім бұлағы» атты тұрақты бұрыш жұмыс істейді. Тақырыптық кітап көрмелері ұйымдастырылады. Сондай-ақ түрлі әдеби кеш, кітап таныстыру, викториналар, зияткерлік сайыстар, мерекелік және тәрбиелік іс-шара жүйелі түрде өткізіліп келеді. Рухани ордамызға тұрақты келетін оқырманымыз да көп. Өткізілген барлық іс-шара мектептің Instagram әлеуметтік желісіндегі ресми парақшасында жарияланып, кітап оқуды насихаттау жұмыстарын кеңінен жүргізіп келеміз.
Мектеп кітапханасы – тек кітап сақталатын орын емес, ол – білім мен тәрбиенің, рухани құндылықтардың және оқырман мәдениетінің орталығы. Алдағы уақытта да оқушылардың кітапқа деген сүйіспеншілігін арттыруға, сапалы білім алу үшін жағдай жасауға және кітапхананың жұмысын жаңа деңгейге көтеруге еңбек етемін.
Аида ЖУНУСОВА,
Д. Қонаев атындағы орта мектептің кітапханашысы
Бескөл ауылы,
Алакөл ауданы
