Жетісу облысының орталығында «Таза Қазақстан» экологиялық акциясы жалғасуда. Сәуір айынының алғашқы сенбісінде ауа райының қолайсыздығына қарамастан Талдықорған қаласы аумағынан 1800 тоннадан астам қоқыс шығарылды.
Жауаптылардың сөзінше, бұл күнге жоспарланған жалпы қалалық сенбілік толассыз жауған жауынның салдарынан кейінге шегерілген болатын. Алайда өз міндеттерін мүлтіксіз атқаруды ойлаған қаладағы коммуналдық мекеме қызметкерлері сол күні таңнан күн батқанға дейін жұмыс жасап, қала аумағындағы тұрғындардың аулаларға шығарған тұрмыстық қалдықтарды толық жинап әкетті. Оған аймақ тұрғындары да белсене атсалысып, арнайы 67 техника жұмылдырылған.
– Ауа райының қолайсыздығына байланысты 5 сәуірдегі сенбілік кейінге ауыстырылған еді. Бірақ толассыз жауған жауынға қарамастан жеке секторлар мен көпқабатты тұрғын үй аумақтарынан қатты тұрмыстық қалдықтар жинау жұмыстары кең ауқымда жүргізілді. Соның нәтижесінде екі тәулік ішінде 200 тоннаға жуық қоқыс үйінділері шығарылды. Бұл жұмыстар жоспарланған кесте бойынша алдағы уақыттарда да жалғасатын болады,–деді қала әкімінің орынбасары Қуаныш Сейтімбетов.
Еске сала кетсек, мұндай жұмыстар өткен жылы да өңірде «Таза Қазақстан» акциясы шеңберінде «Таза өлке», «Киелі мекен», «Жасыл аймақ», «Өнегелі ұрпақ», «Мөлдір Бұлақ» тақырыптарымен қолға алынып, әр апта сайын «Таза Сәрсенбі», «Таза Бейсенбі», «Сенбілік» сынды іс-шаралармен тұрақты түрде өткізіліп келген болатын. Енді бұдан былай да жалғаса бермек.
Айдын КӘЛІМХАН
