2023 жылдың сәуір айында Жетісу облысының экологиялық проблемаларды кешенді шешу жөніндегі Жол картасы әзірленді.
Бекітілген құжаттар бойынша қарастырылған 7 бағыттың өрбу жолын көрсету үшін өңірдегі журналистер үйіне Жетісу облысы экология департаменті басшысының орынбасары, бас мемлекеттік экологиялық инспектор Жанасыл Сабырұлы, өңірлік табиғи ресурстар және табиғатты пайдалануды реттеу басқармасының экологиялық сараптама бөлімінің басшысы Қанат Дәурембеков пен облыстық энергетика және тұрғын үй коммуналдық шаруашылығы басқармасының басшысы Айдос Бекетаев келді.
«Қарастырылған шараның екеуі өз мәресіне жетті. Олар су қорғау аймақтары мен белдеулерін белеу және жасыл желектерді отырғызу жұмыстары. Ал елді мекендерді көгілдір отынмен қамту бойынша ішінара орындалғанын айтқымыз келеді. Жалпы облыс аймағын түгелімен газбен қамту жұмыстары 2030 жылға дейін толығымен жүзеге асырылады. Бұл жобалар департамен тарапынан тұрақты бақылауда болады» — дейді Жанасыл Сабырұлы
«Былтырғы жылы атмосфералық ауаға шекті рұқсат етілген шығарындылардың жылдық лимиті 52 мың тонна болса 12 ай аяғында көлемі 13,5 мың тоннаны құраған.Төгінділердің нақты саны 7,3 мың тоннаға жеткен, ал жылдық лимиті 10,2 мың көлемінде. Қалдықтарды орналастыру 1160,2 мың тонна лимиттің 107,2 мың тоннасына жеткен. Шығарындылардың, төгінділердің, қалдықтарды орналастырудың көрсеткіштері төмендеуіне Жетісу облысы әкімдігінің табиғат қорғау шараларын қаржыландыру нәтижесінде қол жеткізілуде» — деді Қанат Дәурембеков өз сөзінде.
«Қазақстан Ғарыш Сапары» АҚ-ның Жерді қашықтықтан зондтау жүйесі -Геопортал арқылы 149 қалдықтарды стихиялық орналастыру орындары анықталды. ЖАО деректері бойынша – 97% яғни 145 координат жойылды.
«Бұдан басқа, жоспарға сәйкес халықты қоршаған ортаның жай-күйі, облыстың экологиялық мәселелері туралы ақпараттандыру, экологиялық мәдениетті қалыптастыру, экологиялық білім мен ағартуды насихаттау бойынша іс-шаралар өткізілді. Бұл бағытта облыстық, аудандық, қалалық БАҚ және теледидарда белсенді жұмыс жүргізілді», — деп қорытындылады Айдос Бекетаев.
«Жетісу-Ақпарат»
Фото: qazdauiri.kz
