АҚШ бұрынғы президенті Дональд Трамп 69 ел мен аумаққа, сондай-ақ Еуропалық Одаққа қарсы жаңа кедендік баж салығын енгізу туралы жарлыққа қол қойды. Жаңа шаралар қатарында Қазақстан да бар. Бұл туралы 7-su.kz ақпараттық порталы хабарлайды.
Трамптың жарлығы бойынша, Қазақстаннан келетін импорттық тауарларға 25 пайыздық баж салығы салынады. Құжатта бұл шаралар «нақтыланған жауаптық баж салықтары» деп аталып, жеті күннен кейін күшіне енетіні көрсетілген.
Айта кетерлігі, Канадаға қатысты баж салығы бірден күшіне енді. Бұл елге қойылатын салық бұрынғы 25%-дан 35%-ға дейін өсіп отыр. Алайда, бұл тарифтер АҚШ, Мексика және Канада арасындағы USMCA келісімі аясында реттелетін тауарларға әсер етпейді. Негізінен, бұл шаралар Солтүстік Америка шикізатына немесе терең өңдеуден өткен импорттық өнімдерге қатысты болмақ.
Жарлықта көрсетілгендей:
-
Ең жоғары тариф – Сирияға (41%)
-
Лаос пен Мьянма – 40%
-
Сербия – 35%
-
Швейцария – 39% (бұл елдің былтыр АҚШ-қа экспорты 63,4 миллиард долларды құраған)
-
Үндістан – 25%
-
Британия мен Фолкленд аралдары – 10%
-
Бразилия – 10%, бірақ Трамп бұған дейін 50% баж енгізу туралы бөлек жарлыққа қол қойған болатын.
Ең қызығы, бұл тізімде Қытай жоқ. Себебі, АҚШ бұл елмен жеке келіссөздер жүргізіп жатыр. Бірақ, жарлықта тауарды үшінші ел арқылы АҚШ-қа заңсыз тасымалдау мәселесі де қарастырылған. Мұндай жағдайларда тауар нақты шыққан еліне байланысты 40% баж салығымен жазаланатын болады.
АҚШ Кеден және шекара қызметі бұған дейін де Қытай өнімдерін өзге елдер арқылы тасымалдап, баж салығынан жалтарған компанияларды жауапқа тартқан болатын. Енді бұл бағыттағы бақылау күшеймек.
Жаңа тарифтік саясат әлемдік сауда қатынастарына қалай әсер ететіні алдағы уақытта белгілі болады. Дегенмен бұл шешім Қазақстанның АҚШ-пен сауда байланысына тосқауыл қоюы мүмкін.
