Семинардың басты мақсаты – Абай мұрасын насихаттау, оның шығармашылығын, терең философиясын жас ұрпақ санасына сіңіру, ғылыми көзқарас тұрғысынан пайымдау. Іс-шараны облыстық «Тіл» оқу-әдістемелік орталығының басшысы Жеңіс Жолдыбаев жүргізіп отырды.
Шараның шымылдығын облыстық қоғамдық даму басқармасы басшысының орынбасары Ілияс Түстікбаев ашып, Абай шығармашылығының ұлттық сана мен рухани дамудағы рөліне кеңінен тоқталды.
Семинарға қатысушылардың қатарында абайтанушылар, өңір зиялылары, тіл мамандары мен ғалымдар болды. Олардың ішінде Ахмет Байтұрсынұлы атындағы Тіл білімі институтының бас ғылыми қызметкері, профессор Бағдан Момынова сөз сөйлеп, қазақ тілінің диалектілік ерекшеліктеріне тоқталып, оның көркемдік қуаты мен терең мағынасына назар аудартты.
Абайтанушы Жабал Шойынбет өз сөзінде ұстазы, көрнекті ғалым Мекемтас Мырзахметұлының тәлімін тілге тиек ете отырып: «Абайды тану тек ақынды тану емес, хәкімнің биігіне үңілу. Біз ақын Абайды зерттедік, енді хәкім Абайды зерттеуге ден қоюымыз керек. Осы бағытта арнайы кітап жазып жатырмын», – деді.
І. Жансүгіров атындағы Жетісу университетінің профессоры Сайлау Қожағұлов Абайдың поэзиясына терең талдау жасап, оның әрбір өлеңі адам болмысына, ізгілік пен имандылыққа үндеу екенін ерекше атап өтті.
Халықаралық «Алаш» әдеби сыйлығының иегері Әміре Әрін Абайдың махаббат жайлы философиясына назар аударып: «Абай айтқан «махаббатсыз дүние бос» деген жай сезім емес, ол елге, жерге, ана тілге, бүкіл адамзатқа деген шексіз сүйіспеншілік. Абайдың адамгершілік кілті», – деп ой түйді.
Жиын соңында «Қазақстанның Құрметті жазушысы» Нүсіпбай Әбдірахым Абайға арнаған жүрекжарды жырын оқып, кешті рухани шабытпен түйіндеді:
Ақ таңдар атып елге төксін арай,
Жырларың жүректерге жақсын алау.
Қазаққа ес кірген жоқ,
Олай болса,
Сен де әлі ескірген жоқсың, Абай.
Абай әлемі – терең тұңғиық. Сол әлемге сапар шегу – рухани биікке көтерілу. Жетісу төрінде өткен бұл басқосу сол биікке бастар тағы бір игі қадам болғаны анық.
Санжар СҰЛТАНҒАЗЫ
