«Әділет» партиясынан Құрылтай депутаттығына кандидаттар Талдықорғандағы электр желілерін, трансформаторлар мен энергетика нысандарын салу және жөндеуге қажетті бөлшектер шығаратын «DENK» ЖШС зауытының жұмысымен танысты. Партия өкілдері мұндай өндірістерді дамыту Президент Қасым-Жомарт Тоқаевтың еліміздің импортқа тәуелділігін азайту жөніндегі тапсырмасын іске асырудың нақты қадамы екенін атап өтті.
«Бұған дейін шетелден сатып алуға мәжбүр болған өнімдер енді Қазақстанда өндіріледі. Біз үшін осындай кәсіпорындардың саны артып, отандық өндірушілердің дамуына мүмкіндік жасалғаны маңызды», – деді партия төрағасы Айбек Дәдебай.
Кездесу барысында зауыт басшылығы шетелден жабдықтар мен шикізатты импорттау құны жоғары екенін айтты. Аталған мәселеге жауап ретінде «Әділет» партиясының өкілдері сайлауалды бағдарламасында көзделген нақты ұсыныстарды таныстырды. Нақтырақ айтқанда, қазақстандық өңдеуші кәсіпорындарға бірінші кезекте жеткізілуі тиіс шикізат түрлерінің тізімін кеңейтуді және шикізатты ел ішінде терең өңдеу оны сыртқа экспорттаудан тиімді болатындай жағдай жасауды ұсынып отыр.
Одан кейін штаб мүшелері Ескелді ауданы Қарабұлақ ауылындағы қызылша алқабында шаруалармен кездесті. Жиында қант саласын дамыту, субсидия алу және ауыл тұрғындарына көрсетілетін мемлекеттік қолдау мәселелері талқыланды. Партия өкілдері субсидия бөлуді ашық әрі қолжетімді ететін бірыңғай «Е-АӨК» цифрлық жүйесін іске қосуды жоспарлап отырғанын жеткізді. Сондай-ақ Мемлекет басшысының тапсырмасымен қабылданған қант саласын дамытудың бес жылдық бағдарламасын жалғастыруға ниетті екенін жеткізді.
«Фермер үшін өнімді өсіріп қана қоймай, оны тиімді өткізу де маңызды. Диқанның еңбегі лайықты бағаланып, ауылдағы жұмыс отбасының жағдайын жақсартуға мүмкіндік беруі керек», – деп атап өтті олар.
Кандидаттардың айтуынша, ауыл тұрғындарына 2,5 пайыздық жеңілдетілген шағын несие беру бағдарламасы алдағы уақытта да жалғаса береді.
Кездесулердің соңында Жетісу облысының кәсіпкерлері, шаруалары мен дәрігерлері алдағы сайлауда «Әділет» партиясын қолдайтынын білдірді. Депутаттыққа кандидаттар тұрғындардан түскен барлық ұсыныс жан-жақты талданып, алдағы жұмыс барысында ескерілетінін айтты.
Дайындаған: «Әділет» партиясының баспасөз қызметі.
«Әділет» партиясы» ҚБ сайлау қорының қаражаты есебінен төленді.
Тапсырыс беруші: Н.Т. Мыңжасаров.
