Бүгін елімізде өтіп жатқан маңызды саяси науқан барысында өңір тұрғындары ерекше белсенділік танытуда, – деп хабарлайды 7-su.kz ақпараттық порталы.
Атап айтқанда, Текелі қаласындағы әл-Фараби көшесінің тұрғындары ұйымшылдық танытып, №452 сайлау учаскесіне бірлесіп келді.
«Бір көше – бір дауыс» бастамасына алпысқа жуық тұрғын қатысып, өздерінің азаматтық таңдауларын жасады. Бір көшеде тірлік кешіп жатқан көршілер үшін бұл маңызды шара ортақ мүдде мен ауызбіршілікті айқындайтын айшықты сәтке айналды. Әртүрлі буын өкілдерін тоғыстырған бастама тұрғындар арасындағы татулықты нығайтып, сайлау процесіне деген жауапкершіліктің жоғары екенін көрсетті.
Аймақтағы сайлау учаскелері азаматтардың өз еркін еркін білдіруі үшін қолайлы жағдай жасап, кешкі сағат 20:00-ге дейін жұмыс істейді. Елдің ертеңі мен өңірдің дамуы әрбір азаматтың саналы қадамына тікелей байланысты. Тұрғындардың осындай татулығы мен белсенділігі өзгелерге үлгі болып, қоғамдағы өзара сенімді арттыра түседі.
