Алматы облысында шалғай жатқан елді мекендерге газ құбыры тартылып жатыр. Мәселен, Балқаш ауданына газ құбырын тарту жұмысы аяқталуға жақын. Бұл туралы «Жетісу» газеті Алматы облысы әкімдігінің баспасөз қызметіне сілтеме жасап хабарлады.
Облыстық энергетика және тұрғын үй-коммуналдық басқармасының мәліметіне қарағанда, Бақанас ауылында табиғи газға қосылуға 2137 абонент мүмкіндік алды. 500-ден астам үй көгілдір отынға қосылуға дайын. Балқаш ауданының Ақдала ауылына газ жеткізу құбырының және газ тарату құбыры құрылысының жобасы аяқталуға жақын. Сол сияқты Алакөл, Ақсу, Сарқан аудандарын газдандыру үшін «Қапал», «Жансүгіров», «Сарқан», «Қойлық», «Қабанбай» және «Үшарал» АГТС-тарына бұрылатын «Талдықорған-Үшарал» магистралды газ құбыры құрылысының» жобалық-сметалық құжаттары (ЖСҚ) дайындалып жатыр.
Газ құбыры трассасының жалпы ұзындығы 318 км болады. «Талдықорған — Үшарал» магистралды газ құбырынан барлығы 148 елді мекенге газ жеткізіледі, яғни, 156,4 мың адам газбен қамтылады. Сол сияқты Райымбек пен Кеген аудандарының ауылдарын газдандыру үшін «Шелек-Кеген-Нарынқол» магистралды газ құбыры құрылысының» құжаты дайындалуда. Бұл мақсатқа облыстық бюджеттен 316,3 млн.теңге бөлінді. Соның нәтижесінде 17,4 мың халық тұратын 23 елді мекен газдандырылады. Жалпы, осындай жұмыстардың нәтижесінде келесі жылы Алматы облысын газдандыру деңгейі 64 пайызға жеткізу жоспарланған.
«ЖЕТІСУ-АҚПАРАТ»
