23 тамыз – Құрылтай депутаттарының сайлау күні. Осыған орай Үшарал қаласындағы №51 сайлау учаскесіне Қазақстан және Халықаралық жазушылар одағының мүшесі, ақын, «Алакөл» газетінің редакторы А. Есенбеков келіп, өз азаматтық таңдауын жасады.
А.Есенбеков 1994 жылы Сарқан ауданында дүниеге келген. 2012 – 2016 жылдары Жетісу мемлекеттік Университетінің журналистика мамандығын тәмамдаған. 2017 жылы еңбек жолын Алакөл ауданы, Үшарал қаласы, «Алакөл» газетінің тілшісінен бастап, әр жылдары газетте жауапты хатшы, «Жетісу» газетінің тілшісі қызметтерін атқарды. Қоғамда белсенділігі жоғары. Қазіргі таңда «Алакөл» газетінің редакторы. VII шақырылымның депутаты болып, халық пен билік арасында алтын көпір ретінде халықтың әлеуметтік мәселелері шешілуі, ауданның әлеуметтік — экономикасының дамуына елеулі үлес қосқан.
«Бүгін Үшарал қаласындағы №51 сайлау учаскесіне келіп, өз азаматтық таңдауымды жасадым. Құрылтай сайлауы – ел өміріндегі маңызды саяси оқиға. Бұл – халықтың өз болашағына деген көзқарасын білдіріп, ел дамуына ықпал ететін азаматтарға сенім артуының мүмкіндігі. Жазушы ретінде қоғамның тыныс-тіршілігіне, елдің рухани ахуалына бейжай қарай алмаймын. Мемлекеттің дамуы тек экономикалық көрсеткіштермен өлшенбейді. Ұлттық құндылықтарымызды сақтау, ана тілімізді дәріптеу, мәдениет пен әдебиетті қолдау, жас ұрпақтың тәрбиесіне көңіл бөлу – баршамызға ортақ міндет. Құрылтайға сайланған азаматтар халықтың үміті мен сенімін ақтап, елдің бірлігі мен тұрақтылығын нығайтуға, өңірлердің дамуына және рухани-мәдени құндылықтарды дәріптеуге өз үлесін қосады деп сенемін. Бүгінгі сайлау – әр азаматтың ел болашағына қосқан үлесі. Сондықтан барша халықты өз таңдауын жасап, азаматтық белсенділік танытуға шақырамын. Елдің ертеңі – бүгінгі ортақ таңдауымызға байланысты» деді – А.Есенбеков.
