Тәуелсіздік күні қарсаңында желтоқсанның нағыз ызғары атқа қонғандай. Қақаған аязбен қабаттаса келген қарлы боран Жетісу жұртын біраз әбігерге салды. Үшарал-Достық тас жолы жабылып, Алакөл ауданы аумағында қар құрсауында қалған 8 адам құтқарылды.
Жетісу облыстық төтенше жағдай департаментінің мәліметінше, Алакөл ауданы Жалаңашкөл аумағындағы күре жолда бір жеңіл автокөлік қар құрсауында қалған. Оқиға орнына жедел жеткен құтқарушылар теміржол бойында тұрып қалған көліктегі 2 адамды жақын маңдағы елдімекендердің біріне орналастырған. Сонымен бірге мамандар өңірдегі Көктұма ауылы маңынынан тағы бір жеңіл көлікті қардан шығарып, 6 жолаушыны қауіпсіз жерге жеткізген.
– «Дер кезінде тиісті көмек көрсетілгендіктен қар құрсауынан құтқарылған 8 адамның да жағдайы жақсы. Ешқандай медициналық көмекке жүгінген жоқ. Дейтұрғанмен, қыстың көзі қырауда. Қыс мезгілінде жолға шыққан әрбір жолаушы ауа райы туралы хабарламаларды естен шығармай сақтана жүруі тиіс» – дейді құтқарушы саланың мамандары.
Айдын КӘЛІМХАН
