Адамзаттың жанын жадыратқан көктемнің алғашқы айының үлкен мерекелермен бастау алуының өзі еліміздегі бейбіт өмір, бірлік, берекенің, татулықтың айшықты айғағы. Халқымызды осы бақуатты тіршіліктен айырмай, Тәуелсіздігіміз мәңгілік болғай.
Өмірдің сан қилы қиындықтарын бастан өткергендіктен елімнің бүгінгі таңдағы мамыражай тіршілігі мен үшін үлкен қуаныш. «Ащының дәмін татпай тұщының қадіріне жетпейсің» демекші, елге үлкен қасірет әкелген 1941-1945 жылдар аралығындағы Екінші дүниежүзілік соғыс зұлматын, одан кейінгі халық шаруашылығын қалпына келтіру кезеңіндегі қиындықтарды бастан өткерген мен сияқты қарттарға бейбіт өмірдің бағасы қымбат. Сондықтан болар, арайлап атқан әр таңға тәубе деп, шапағын шашып батқан күнге салауат тілеу әдетіміз.
Алғыс айту күнімен басталып, 8 наурыз – Аналар, қыз-келіншектер күні мерекесіне ұласқан әз Наурыз барша қазақстандықтарға шырайлы шуағын шашсын. Ел іргесі бүтін болып, бейбіт, берекелі тіршілік кешейік. Барша елімізде, жер жаннаты Жетісу өлкесінде өмір сүріп жатқан құрбыларым мен сіңлілерімді 8 наурыз – Аналар, қыз-келіншектер күні мерекесімен шын жүрегімнен құттықтап, бәрінің отбасына амандық тілеймін!
Күләш Айтжанова,
Еңбек Ері
