Тарихты төрге оздырған, ұрпақты ұлағатқа бастаған «Ардагер өсиеті» атты республикалық жастар марафоны Талдықорған қаласында жалғасын тапты. Мәңгілік алаудың маңында өткен бұл жиын – ұрпаққа бағытталған ұзақ жолдың берік тұтқасы.
Шараны ұйымдастырған ««Jetіsý jastary» коммуналдық мемлекеттік мекемесі. Мақсат – майдангердің мұрасын ұлықтау, кейінгі жасқа елжандылықтың дәнін егу, буындар арасындағы рухани сабақтастықты бекемдеу.
Бұл бастама алғаш Ақтөбе өңірінен бастау алды. Жолай талай облыстың жастарын ортақ рухқа үндеп, бір арнаға тоғыстырды. Жетісу жұртына ол Алматы облысынан аманат хат арқылы жетті. Енді киелі керуен Шығыс Қазақстанға жол тартты.
Орталық алаңда өткен жиында жастар ардагерлермен жүздесті. Жүздесіп қана қоймай, жүрекке жылу, санаға сәуле сыйлаған сырлы әңгімелерін тыңдады. Өткеннің өрелі жолы бүгінгі ұрпаққа бағдаршам. Ардагерлердің әрбір сөзі тасқа басқан таңбадай.
Мәңгілік алауға гүл шоқтары қойылып, ел қорғаған ерлердің рухына тағзым етілді. Қарт сарбаздарға зор құрмет көрсетіліп, естелік сыйлар табысталды. Әрине, бұл үлкен құрметтің белгісі.
Шара барысында сөз алған «Jetіsý jastary» мекемесі директорының орынбасары Арнай Рақымберліұлы:
– Ардагерлер жүріп өткен жол жас ұрпаққа өнеге. Олардың жарқын істері өшпесін десек жастар санасына ел мен жердің қадірін, ардагерлердің өсиетін насихаттауымыз қажет. Бұл марафон елдік жолдың елшісі. Тағдырлы тарих пен тағылымды тұлғалар жайлы сөз қозғалса, жастарға өнеге болатын дүние осы. Ардагердің аманатын арқалаған буын адаспайды, – деп салмақты ой өрбітті.
«Ардагер өсиеті» өткеннен жеткен аманат. Аманатқа қиянат жасалмайды. Мұндай марафон ел есінде сақталар, рух пен ұрпақты жалғайтын мәңгілік көпір.
C. КӘКІМҰЛЫ
