Талдықорғанда халықтық атағы бар және жаңадан құрылған театрлардың облыстық фестивалі өтті.
Байқауда өткен жылғы облыстық фестивальде Құдаш Мұқашевтың «Дала дастанын» сахналап, бас жүлдені, Атырауда өткен республикалық байқауда «Үздік сценография» номинациясын қанжығалаған Ақсу халық театры бірінші болып өнер көрсетті.
Өнер отауы Шеге Елубаевтың «Абай ауылында» қойылымымен шымылдық ашты. Ақсу халық театры сахнаға жан бітірді. Құнарлы топырақтың мың сан өнерді бір бойына сіңірген әртістері көрерменді бірден баурап әкетті. Майраның әні шырқалғанда оқиға желісі ашыла түсті. Әсем ән жүректі баурады.
Ақсу ауданы халықтық театры тарихи деректерге сүйене отырып, Абай ауылының көрінісін музыкалық үлгіде көрсетті. Қойылымда Әсеттің, Біржан салдың әндері орындалды. Автор дәстүрлі ән айту, ұлттық ойын, бата беру, туған жермен қоштасу сияқты ауыз әдебиетіндегі үлгілерді сахналық көрініске ұтымды ендіре білген. Ұлттық салт-дәстүр пьесаның көркемдік пішінімен біте-қайнасып кеткен.
Шығарманың жанрлық қалпына ұлттық колорит беріліп, әрлендіріліп, қойылымның мазмұны ашыла түсті. Негізгі тартыс ескілік әдет заңы мен жаңа дәуір талабының зұлымдық пен адамшылық арасындағы күрес. Басты рөлді сомдаған көркемсөз оқу шеберлері республикалық байқауының Гран-при иегері Жасұлан Китапияновтың орындаушылық шеберлігі ұлы Абай образымен үйлесім тапты. Қойылым көпшіліктің көңілінен шықты. Ойын аяқталысымен халық дүркірете қол соғып, әртістер қауымына қошемет көрсетті.
Ақсу қуыршақ театры түстен кейін Бақытжан Құлжабайдың «Қошқар мен теке» қойылымын сахналап, балалардың көңіл пернесін таба білді. Ертегі кішкентай көрермендерді еліте білді. Жалпы, бұл облыстық байқауға барлығы 25 театр қатысады. Оның ішінде 6 халық театры, 3 қуыршақ театры және 10 аудан өнерпаздарынан құралған театрлар өз өнерлерін ортаға салады.
Гүлжан ТҰРСЫН
Алматы облысы
