Соңғы 10 жылда Қазақстанда тіркелген үкіметтік емес ұйымдардың саны 20 мыңға жуықтаған. Мамандардың айтуынша, олардың 2 мыңдайы ғана жұмыс істеп тұр. Себебі, бұл ұйымдардың тағдыры тікелей қаржыға келіп тіреледі. Облыс бойынша шамамен 500-ге жуық үкіметтік емес ұйым тіркелсе, соның 200-ге жуығы белсенді жұмыс атқаруда.
Облыс әкімінің орынбасары Диас Есдәулетовтың төрағалығымен өткен облыс әкімдігінің жанындағы үкіметтік емес ұйымдармен өзара іс-қимыл және ынтымақтастық жөніндегі кеңестің кезекті отырысында бірқатар келелі мәселе қаралды.
Мемлекеттік органдардың басшылары мен аудан әкімінің орынбасарлары қатысқан отырыстың негізгі «Хаттамалық тапсырмалардың орындалуы» туралы баяндаманы облыстық қоғамдық даму басқармасының басшысы Бауыржан Әбибеков жасады.
Баяндамашының сөзінше, хаттамадағы 11 тармақтың 3-еуі толық орындалса, қалған тармақтар бойынша тапсырмалар беріліп, бақылауға алынған.
«Атап айтқанда, білім басқармасы тарапынан 2025 жылға арналған мемлекеттік әлеуметтік тапсырыс аясындағы жобаларға қаражат бөлінбеді. Облыс бойынша мемлекеттік әлеуметтік тапсырыс аясындағы жобалар «Мемлекеттік әлеуметтік тапсырысты қалыптастыру, оның іске асырылу мониторингі және нәтижелерін бағалау қағидаларына» сәйкес жүзеге асырылуда», – деген Б. Бақытұлы аудандық, қалалық әкімдіктермен 2025 жылға мемлекеттік әлеуметтік тапсырыс аясында жүзеге асырылатын әлеуметтік жобалардың тақырыптарын бекіту, техникалық сипаттамаларын әзірлеу және мемлекеттік әлеуметтік тапсырысқа қаражат қалыптастыру мақсатында үкіметтік емес ұйымдардан ұсыным жинау, тыңдау және талқылау үшін ҮЕҰ-мен кездесу ұйымдастырып, жария талқылау үшін ресми сайтқа тізбелерін жариялап, қаржы мәселесін шешу бойынша мәслихат және экономика, бюджеттік жоспарлау басқармасымен тиісті жұмыстар уақытылы жасалмағанын айтты.
Хаттама бойынша жария талқылау Алакөл ауданында өткен жылдың қараша айында, ал Ақсу, Ескелді, Панфилов аудандары, Талдықорған мен Текелі қаласында осы жылдың қаңтар айында жүргізілсе, қалған аудандарда әлі күнге дейін жүргізілмеген.
Баяндамашы хаттамаға сәйкес аудан, қалаларға 2025 жылғы мемлекеттік әлеуметтік тапсырыстың көлемін ұлғайту бойынша тапсырма берілгенін де тілге тиек етті.
2025 жылға облыс бойынша 90 жоба қарастырылса, күні бүгінге 52 лотқа конкурс жарияланған. Ал 18 лотқа конкурстық рәсімдер жүргізілуде, 20 лот бойынша конкурс жарияланбапты.
Отырыстың күн тәртібіндегі екінші мәселеде сараптамалық кеңестің құрамы бекітілсе, «Жергілікті атқарушы органдардың ҮЕҰ-мен өзара іс-қимыл және ынтымақтастық жөніндегі жұмыстары» бойынша Кербұлақ, Панфилов аудандарының, Талдықорған қаласы әкімінің орынбасарлары мен Жетісу облысының Азаматтық альянсының президенті Дания Қыдырбаева баяндама жасады.
Кеңесті қорытындылаған облыс әкімінің орынбасары Диас Рахметұлы көтерліген мәселелер төңірегінде ұсыныс енгізілу қажеттігін, осы бойынша нақты тапсырма жүктеп, оның орындалуы қатаң қадағалауға алынатынын қадап айтты.
Сарби ӘЙТЕНОВА
Суретті түсірген Дмитрий ЕРОФЕЕВ
