Панфилов ауданы – тарихы терең, жері құнарлы, мәдениеттер тоғысы қалыптасқан өлке. Мұнда тұрғындар ата-баба аманатына деген құрметімен және елдің қоғамдық-саяси өміріне белсенді араласуымен ерекшеленеді, – деп хабарлайды 7-su.kz ақпараттық порталы.
Бұл ауызбіршілік пен жалпыұлттық құндылықтарға деген берік ұстаным сайлау күні ауыл тұрғындарының белсенділігінен де анық көрінді. Олар ауыл шаруашылығын қолдау мен инфрақұрылымды жаңартуды туған ауылдың келешегімен байланыстырып, дауыс беруге бір кісідей келді.
Жергілікті шаруалар мен жақын маңдағы елді мекен тұрғындарының басын қосқан орталық – Керімағаш ауылында орналасқан №313 сайлау учаскесі болды. Ауыл тұрғындары сайлау учаскесі ашылған сәттен бастап бірге келіп, жоғары азаматтық жауапкершілік пен ұйымшылдық танытты.
Ауыл тұрғындарын толғандыратын негізгі мәселелердің қатарында ауыл шаруашылығы өндірушілерін жан-жақты қолдау, әлеуметтік инфрақұрылымды дамыту және жергілікті жолдарды жаңғырту бар. Олар мемлекеттік үдерістерге қатысу – өңірдегі өзекті мәселелерді шешудің тікелей құралы деп санайды.
«Ауылда барлық мәселені бірлесіп шешуге үйренгенбіз. Егер ауылға инвестиция тартылып, мектептер жаңартылып, шаруа қожалықтарына қолдау көрсетілсін десек, өз белсенділігімізді танытуымыз керек. Біз біртұтас қауым болып келдік. Өйткені туған өлкенің болашағы әрбір тұрғынның ел ісіне қатысуына байланысты екенін түсінеміз», – деді Керімағаш шипажайының директоры Болат Қошқинов.
Қоғамда ашық диалог, халық бірлігі мен парасаттылық қағидаттары барған сайын орнығып келеді. Бұл ретте мемлекет пен оның өңірлерінің даму бағыттары айқындала түсуде. Шекаралық аудан тұрғындары үшін қоғамдық келісімді нығайту, мәдени құндылықтарды сақтау және ауылда өмір сүруге қолайлы жағдай жасау мәселелері ерекше маңызды.
«Адал әрі жасампаз еңбек пен әр азаматтың жауапкершілігі қағидаттары орныққан кезде, бұл әрбір ауылдың өркендеуіне нақты серпін береді. Біз үшін бұл жай ғана азаматтық борышты орындау емес. Бұл – тұрақтылыққа, салт-дәстүрді кейінгі ұрпаққа жеткізуге және Панфилов ауданы мен бүкіл Қазақстанның жарқын болашағына деген сенімге қосылған саналы үлес», – деді кәсіпкер.
