ҚР Қарулы Күштерінде ерлермен қатар ел қорғау міндетін атқарған арулар қатары жыл санап артып келеді. Нардың жүгін арқалап, иығына шен тағып, ел тыныштығын күзетіп жүрген нәзік жандар облысымызда да баршылық. Солардың бірі – Талдықорғандағы №48386 әскери бөлімі байланыс взводының аға маман радио телеграфисі, кіші сержант Әсем Сехимбаева.
Шеңгелді ауылында туып-өскен Әсем Ержанқызы бала күнінен әскери салада қызмет істеуді армандайды.
– Бала күнімде ауылдағы әскери бөлімнің алдынан өткен аруларды көргенде өскенде мен де ел шебінде, ҚР Қарулы Күштерінде жұмыс істеймін деп армандайтынмын. Әсіресе, әскери саланың киімдеріне қатты қызығатынмын, – дейді ол.
2000 жылы Әсемнің бала күнгі арманы орындалып, Шеңгелді ауылындағы әскери бөлімге жұмысқа орналасады. Жұмысқа кірген күннен бастап қайсар қыз өзінің еңбекқорлығымен, жұмысқа деген құлшынысымен көзге түседі. Кейін Талдықорғандағы №48386 бөлімге ауысады. Мұнда да өз ісінің маманы жауынгерлік даярлықтан жоғары нәтиже көрсетеді. Атыс, дене даярлығынан бөлек ерлермен қатар парашютпен секіреді.
– Әркімнің биіктіктен төмен құлдилауға батылы жете бермейді. Ең алғаш десантшылар салмағы 16 келі болатын «Д-6» парашютымен секіреді екен. Оның өзінде барлық қыз бала секірмейді. Мұнда парашют өзі ашылады және қай жерге қонсаң да өз еркің. Тек қонарда екі аяғыңды бірге ұстап тұрсаң болғаны. Егер аяқтарыңның арасы кішкене ашылып кетсе денеңе зақым келеді, – дейді кейіпкеріміз.
Осындай ерен ерлігінің арқасында биік белестерді бағындырған Әсем 2015 жылы ҚР Қарулы Күштеріндегі әскери қызметші қыз-келіншектер арасындағы «Батыр арулар» I республикалық байқауының жеңімпазы атанады. Сонымен қатар, кейіпкеріміз III дәрежелі мерейтойлық, «Мінсіз қызмет атқарғаны үшін»,«Әскери барлаудағы қызметі үшін» сынды көптеген медальдардың иегері.
Иә, әскери өмір нәзік жанды әйел заты үшін оңай емес. Бүгінде жауынгерлік дайындық бөлімінің аға маманы, жауапты атқарушысы қыстың қақаған аязына, жаздың аптап ыстығына қарамастан өз міндетін мүлтіксіз атқаруда. Кейіпкеріміз жұмысында мықты маман, отбасында аяулы жар, ардақты ана. Әсем Сехимбаева отағасы, отставкідегі полковник Ұлан Сарқытбекұлы екеуі 4 ұл, 1 қыз тәрбиелеп отыр. Ата-анасының ізін жалғаған үлкен ұлдары Сағадат Нұрмұхамбетов атындағы әскери білім ордасында оқиды.
Отбасында ардақты ана, жұмыста білікті маман, жақсы нәтиже көрсетіп жүрген әскери қызметкердің жұмысы көпке үлгі.
Айдар ҚАЛИЕВ
