№273 сайлау учаскесіндегі дауыс беруге қатысу белсенділігін Панфилов ауданындағы «Eurotransit – КТС» ЖШС ұжымы жалғастырды.
Ел өзінің даму бағыттарын айқындаған кезде бұл жоспарларды жүзеге асыруда экономиканың нақты секторы мен онда еңбек ететін адамдардың рөлі ерекше. Панфилов ауданындағы «Eurotransit – КТС» ЖШС – жүк ағынының үздіксіз қозғалысын қамтамасыз етіп, Қазақстанның көлік-транзиттік әлеуетін нығайтып отырған ірі логистикалық торап.
Кәсіпорынның 42 қызметкері ұйымдасқан түрде сайлау учаскесіне келді. Олардың арасында терминалдың түрлі бағыттағы мамандары – кран операторлары, жүк өңдеу жөніндегі мамандар, тальмандар және күн сайын күрделі мультимодальды контейнерлік пойыздарды өңдеуді қамтамасыз ететін әкімшілік қызметкерлер болды.
Кәсіпорын директорының орынбасары Руслан Джаналиев шекара маңындағы инфрақұрылымның қарқынды дамуы мен сауда-экономикалық байланыстардың кеңеюі әрбір қызметкер мен оның отбасының әл-ауқатына тікелей әсер ететінін атап өтті.
«Біздің терминал – Шығыс пен Батыс арасындағы тасымал тізбегіндегі заманауи буын. Соңғы жылдары жұмыс көлемінің артқанын, жаңа қуаттардың іске қосылғанын көріп отырмыз. Ұжымымыздың дауыс беруге қатысуы – саналы әрі ойластырылған қадам. Біз экономиканы одан әрі нығайтуды, инфрақұрылымды жаңғыртуды және ертеңгі күнге деген сенімділікті таңдаймыз», – деді ол.
Кәсіпорын қызметкерлері сайлау науқанының еліміздің көлік саласы үшін маңызы зор екенін атап өтті. Олардың пікірінше, сайлау әрбір қызметкер үшін маңызды қоғамдық оқиға. Олар мемлекеттік деңгейдегі диалог алаңдары мен заң шығару орындарында ел болашағын айқындайтын стратегиялық мәселелер алдағы уақытта да көтерілетініне сенімді.
Олардың қатарында көлік-логистикалық инфрақұрылымды жаңғырту, халықаралық саудаға қолайлы жағдай жасау, адал еңбекті қолдау және заңдылықты нығайту секілді маңызды бағыттар бар.
«Біз күн сайын Қазақстанның Еуразиядағы сенімді әрі технологиялық тұрғыдан дамыған логистикалық көпір болып қалуы үшін еңбек етіп келеміз. Құрылтайдың стратегиялық міндеттері бүкіл еліміздің алға қарай нық қадам басуына ықпал ететініне кәміл сенеміз», – деді компания өкілі.
