Қазақы салт-дәстүрді, әдеп-ғұрыпты кеңінен насихаттайтын Талдықорған қаласындағы «Зүбан апа» балабақшасын ерекше атауға болады. Балабақша табалдырығын аттаған сәттен-ақ қазақылықтың иісі аңқып тұр. Бақыт мекенінде былдырлаған баланың бәрі де қазақша ән салып, тақпақ айтып, домбырада күмбірлетіп күй шертеді. Міне, бүгінгі заманның бақытты балалары дәл осындай ұлттық тәрбиемен ержетулері керек.
Балабақшаға ұлттық тәрбие енгізу арқылы ұлтжанды, парасатты ұрпақ тәрбиелеу мақсатында ұйымдастырылған «Ұлттық құндылық – ұлттық тәрбие» атты облыстық семинар да дәл осы балабақшада өтті. Оған қаладағы барлық балабақшаның меңгерушілері қатысты. Ұлттық құндылықпен сусындауға келген көпшілік былдырлаған балақайлардың өнерлерін тамашалады. Балдырғандар асық биін билеп, қолөнер бұйымдарын көрсетіп, көптің қошеметіне бөленді. Балабақша меңгерушісі Рауан Нұрпейісова әуелетіп ән салып, қазақтың салт-дәстүрін кеңінен насихаттады.
Семинарға арнайы келген қоғам қайраткері Оразгүл Асанғазы балабақшаның беталысына ризашылығын білдіріп, мұндай бағыттағы нысандардың саны көп болсын деген ақжарма тілегін жеткізді.
– Бүгінгі қазақ қоғамына дәл осындай балабақшалар ауадай қажет. Осындай бастаманы қолға алған Айнаш Рыскелдиновадай қазақ қызын қолдауымыз керек. Біз ұрпағымыз үш тілді жетік меңгерсін десек, ең бірінші кезекте қазақ тілін оқытудан бастайық. Ананың ақ сүтімен бойына дарыған қасиетті тілдің болашағы сіздердің қолдарыңызда. Қазақстанның бүкіл мектептері мен балабақшалары тек қазақ тілінде болуы тиіс. Сондықтан балабақшаға келетін барлық баланы қазақша топқа қабылдап, қазақ тілінде тәрбилеуге көп болып атсалысайық. Бәріміз біріксек, жұмыстың жемісті болары анық, – деді Оразгүл Асанғазы.
Ұлттық құндылыққа негізделген семинарға келген көпшілік көңілге түйетін мол мағлұмат алып қайтты. Тіл жанашыры, қоғам белсендісі Оразгүл Асанғазының тілге тиек еткен тіл тағдыры жайлы орамды ойларын газетіміздің алдағы санынан оқи аласыздар.
Еңлік КЕНЕБАЙ
