Қазақстанда екінші деңгейлі банктер депозиттер бойынша сыйақы мөлшерлемелерін қайта қарай бастады, – деп хабарлайды 7-su.kz ақпараттық порталы.
Еліміздің қаржы нарығында елеулі өзгерістер орын алып жатыр. Ұлттық банк базалық мөлшерлемені 17%-дан 16,75%-ға дейін төмендеткеннен кейін, коммерциялық банктер де өздерінің депозит өнімдерінің шарттарын жаңартуға көшті. Мұндай қадам ең алдымен жаңадан ашылатын және мерзімі ұзартылатын салымдарға тікелей әсер етеді. Сондықтан әрбір салымшы өзінің жинақ ақшасын қайда және қалай орналастыру керектігін қайта саралағаны абзал.
Алғашқылардың бірі болып бұл жаңалықты Kaspi Bank, Freedom Bank Kazakhstan, Home Credit Bank, Еуразиялық банк және Bank RBK өкілдері ресми түрде жариялады.
Жаңа ережелерге сәйкес, Kaspi Bank 2026 жылғы 5-6 тамыздан бастап теңгедегі Жинақтаушы Kaspi Депозит бойынша жаңа жылдық тиімді сыйақы мөлшерлемесін (ЖТСМ) 19% деңгейінде бекітті, ал номиналды мөлшерлеме 17,5%-ды құрайды. Айта кетерлігі, бұл талап тек жаңа жинақтарға қатысты. Ал 5 тамызға дейін ашылған салымдардың бұрынғы шарттары келісімшарт мерзімі аяқталғанша сақталады. Сондай-ақ қарапайым Kaspi Депозит бойынша теңгедегі 15% және доллардағы 1% мөлшерлеме өзгеріссіз қалды.
Өзге де қаржы институттары өз өзгерістерін ұсынды. Freedom Bank Kazakhstan 9 тамыздан бастап «Капитал» депозиті бойынша бір айлық теңгелік салымға ЖТСМ-ді 18% етіп белгіледі. Home Credit Bank болса «Жинақ Хоум+» өнімі бойынша ЖТСМ-ді 20%-дан 19,60%-ға дейін төмендетті. Еуразиялық банк «TURBO депозиті» бойынша ЖТСМ-ді 19,23% деңгейінде жаңартса, Bank RBK 3-24 ай мерзімге жылдық 19%-ға дейінгі ЖТСМ ұсынып отыр. Бұл ретте салымның ең төменгі көлемі 15 мың теңге болып бекітілген.
Бұл үдерістің басты себебі – инфляцияның бәсеңдеуі. Маусым айында жылдық инфляция 10,3%-ды құрап, қатарынан тоғызыншы ай бойы төмендеп келеді. Экономикадағы баға тұрақтылығы сақталған сайын, Ұлттық банк ақша-несие саясатын жұмсартады. Ал бұл өз кезегінде депозит мөлшерлемесінің төмендеуіне алып келеді.
