Президент Қасым-Жомарт ТОҚАЕВ халықтың өмір сүру сапасын жақсарту, тұрғындарды қолжетімді әрі қауіпсіз баспанамен қамтамасыз ету мәселесін мемлекеттік саясаттың басым бағыттарының бірі ретінде айқындап келеді. Осы тапсырманы жүйелі жүзеге асыру мақсатында Талдықорған қаласында да ауқымды жұмыстар атқарылуда. Соның жарқын дәлелі – апатты тұрғын үйлерде тұрған азаматтарды жаңа қонысқа көшіру ісінің кезең-кезеңімен жүзеге асырылуы.
Талдықорған қаласы әкімдігінде 17 отбасыға жаңа пәтердің кілті табысталып, талай жылдан бері апатты баспананың тауқыметін тартып келген тұрғындардың көптен күткен арманы орындалды. Жаңа пәтер иелерін қала әкімі Ернат Бәзіл қоныстоймен құттықтап, жайлы әрі қауіпсіз баспанамен қамту – мемлекет жүргізіп отырған әлеуметтік саясаттың басты бағыттарының бірі екенін атап өтті.
Азаматтардың өмір сүру сапасын арттыру, тұрғын үй жағдайын жақсарту – Мемлекет басшысының тұрақты назарындағы мәселе. Облыс әкімі Бейбіт Исабаевтың қолдауымен бұл бағыттағы жұмыстар жүйелі жалғасып келеді. Біздің басты мақсатымыз – апатты үйлерде тұратын тұрғындардың мәселесін толық шешіп, олардың қауіпсіз әрі жайлы жағдайда өмір сүруіне мүмкіндік жасау, – деді Ернат Дүйсенбекұлы.
Жаңа қоныс иелері «Береке» коттедж қалашығынан, «Жастар-1/1» және «Жастар-3» шағын-аудандарынан тұрғын үй алды. Бұл үйлер қажетті инженерлік инфрақұрылыммен қамтамасыз етіліп, тұрғындардың жайлы өмір сүруіне барлық жағдай жасалған. Өткен жылы қала әкімдігі апатты үйлердің тұрғындарын көшіру мақсатында 16, биыл 21 тұрғын үй сатып алды. Жыл соңына дейін жалпы 29 отбасы жаңа баспанамен қамтылады деп жоспарлануда. Осылайша, Талдықорған қаласындағы апатты үйдің тұрғындарын көшіру мәселесі толықтай шешімін табады.
Бұл күн – жаңа қоныс иелері үшін ерекше қуанышқа толы сәт болды. Солардың бірі – 81 жастағы Жанатай Сүгірбаева. Ол жиырма жылдан астам уақыт бойы апатты үйде өмір сүрген. Қолына жаңа пәтердің кілтін алған кейуана қуаныштан тебіреніп, ақ батасын берді.
Ел іргесі аман, жұртымыз тыныш болсын. Халқымыздың тұрмысы жақсарып, жастарымыздың болашағы жарқын болып, бастаған істеріне береке берсін. Осындай игі істің басы-қасында жүрген азаматтарға аналық жүрегіммен алғыс айтамын, – дейді қуаныш иесі.
Қоныстойын тойлағандардың қатарында Наталья Дроздова да бар. Ол жаңа баспананың қаншалықты маңызды екенін ерекше толқыныспен жеткізді.
Біз 40 жыл бойы апатты үйде тұрдық. Соңғы 10 жылда өмір сүру өте қиынға соқты. Қабырғалар жарылып, үйдің тозығы жетті. Бүгін, міне, жаңа үйдің кілтін алып, ерекше қуанышқа бөленіп отырмыз. Соңғы жылдары Талдықорғанның көркейіп, жаңа тұрғын үйлер мен әлеуметтік нысандардың бой көтеріп жатқанын көріп, қуанамыз. Осындай қамқорлық танытқан қала басшылығына және осы іске атсалысқан барлық азаматқа шынайы ризашылығымымды білдіремін, – деді ол.
Талдықорғандықтардың көптен күткен арманы орындалды. Олар енді қауіпсіз, жайлы әрі заманауи баспанада жаңа өмірге қадам басты.
Еңлік КЕНЕБАЙ
