Премьер-Министрдің орынбасары Бердібек САПАРБАЕВ Талдықорған қаласындағы №27 мектепке барып, облыс ұстаздарымен кездесті.
Аталған мектеп директоры Гүлжан Сыдыбаеваның айтуынша, білім ошағы 1200 оқушыға арналған. Қазіргі таңда мұнда 1157 оқушы білім алуда. Сонымен қатар, бұл ғимаратта «Жетісу дарыны» облыстық дарынды балалар мен жастарға қосымша білім беру оқу-әдістемелік орталығы нәтижелі жұмыс атқарады.
Жұмыс тобы алты бөлімнен, яғни, қаржы-заңгерлік, педогогикалық шеберлік, дарындылықты дамыту психологиясы, зияткерлік шаралар, баспасөз қызметі және ІТ технология кабинеттерін аралап, оқушылардың жетістіктерін көрді. Қала, аудан мен ауылдардан келген белсенді, шығармашыл балалардың білімін шыңдайтын орталықтың жұмысы көпшіліктің көңілінен шықты.
Орталықтың білімді жастары түрлі робот жасап, халықаралық жарыстарға қатысып, еліміздің атын дүниеге таныстырып жатқанын ерекше атап өту керек.
Орталық жұмысымен танысқан соң Бердібек Машбекұлы мектеп директорларымен кездесті. Жиында бала тәрбиесі, білім сапасы, мұғалімдер беделі туралы әңгіме қозғалды.
– Ұстаздар қауымы бала тәрбиесіне мән берсеңіздер екен. Мысалы, тәрбие ұлттық құндылықтар төңірегінде өрбуі керек. Кезінде мектеп басшысы оқушыларды сыртқы есіктен қарсы алып, оның көңіл-күйіне жіті мән беретін. Қазір мектеп директоры оқушыларды танымайды, – деді Бердібек Сапарбаев. Сонымен қатар, ұстаздар қауымына әлеуметтік желілерде белсенділік танытып, ел ішіне іріткі салатындармен, жат дүниеге деген көзқарас қалыптастыратындармен күресіп, қарсы ашық ойларын білдіру керектігін айтты.
Кездесуде мектеп түлектерімен тығыз байланыс орнату керектігі сөз болды. Колледждерде білім сапасының тым төмен екендігін тілге тиек еткен Бердібек Машбекұлы оқыту мазмұнын арттыруды тапсырды. Сондай-ақ, дуалды білім беруде сапа, нәтиже болуы шарт екенін айтты. Жиында жастардың жұмыссыздық мәселесі де назардан тыс қалмады. Кездесуде Бердібек Сапарбаев ұстаздарды мазалаған сұрақтарға жауап берді.
Еңлік КЕНЕБАЕВА
Алматы облысы
Сурет ғаламтордан алынды
