Облыста көкөніс және бақша дақылдарын жинау науқаны қарқынды жүріп жатыр. Биыл 8,4 мың гектарға көкөніс егілсе, оның 6,9 мың гектары жиналды. Ал бақша дақылдары егілген жалпы 4,5 мың гектардан 138 мың тонна өнім алынды. Картоп жинау жұмыстары да жоспарға сай жүргізілуде. Жалпы көлемі 6,5 мың гектар картоп алқабының 3,5 мың гектары жиналып, 78,5 мың тонна өнім алынды. Орташа өнімділік гектарына 225,9 центнерді құрады.
Қаратал ауданы көкөніс және бақша дақылдарын өсіруге қолайлы өңірлердің бірі. Биыл ауданда 649,4 гектарға картоп, 1844,5 гектарға көкөніс, 735 гектарға бақша дақылдары егілді. Әсіресе қауын-қарбыз бен пияз өсіруде қараталдық диқандардың тәжірибесі мол. Дақылдарды баптаудың қыр-сырын жетік меңгерген шаруалар өнім көлемі мен сапасы жағынан облыстың өзге аудандарына үлгі боларлықтай нәтиже көрсетіп келеді.
Өңірдің қолайлы табиғи-климаттық жағдайы, құнарлы топырағы және қалыптасқан егіншілік дәстүрі көкөніс пен бақша шаруашылығын одан әрі дамытуға кең мүмкіндік береді. Осы бағытта тұрақты жұмыс істеп келе жатқан шаруашылықтардың бірі «Рәм С.» шаруа қожалығы.
Қожалық 2012 жылдан бері Қаратал ауданында пияз өсірумен кәсіби түрде айналысып келеді. Шаруашылықтың егістік жұмыстарын жүргізуге қажетті техникалық базасы қалыптасқан. Мұнда үш «МТЗ» тракторы, пияз қазғыш пен тиегіш, сондай-ақ жер жыртуға арналған «К-700» тракторы бар.
Биыл шаруа қожалығы 30 гектар алқапқа пияз еккен. Егістік заманауи тамшылатып суару жүйесі арқылы суарылады. Мұндай тәсіл суды үнемдеуге, топырақтағы ылғалды біркелкі сақтауға және өнім сапасын арттыруға мүмкіндік береді. Пияз жинау науқанын 20 қыркүйекте бастау жоспарланып отыр. Жиын-терім жұмыстарына шамамен 20-30 адам жұмылдырылмақ.
Қаратал жерінде өсірілген пияз ішкі нарықта ғана емес, көршілес Ресейде де жоғары сұранысқа ие. Өнімнің кеңінен танылуына оның сапасы, ерекше дәмі және ұзақ сақталатын қасиеті әсер етіп отыр. Жергілікті мамандар мұны Қаратал өңірі топырағының өзіндік ерекшелігімен, соның ішінде жер құрамындағы тұздылық мөлшерімен байланыстырады. Осы табиғи қасиет пиязға айрықша дәм беріп, сапасын арттыра түседі. Сондықтан «Рәм С.» шаруа қожалығының өнімі тұтынушылар тарапынан жоғары бағаланып, сыртқы нарықтағы орнын тауып келеді.
Шаруашылыққа барғанымызда қызу еңбек пен қарбалас тірліктің куәсі болдық. Бірі ауыл шаруашылығы техникаларын жөндеп жатса, енді бірі егістік алқабындағы дайындық жұмыстарын ретке келтіруде. Жұмысшылар тамшылатып суару жүйесіне пайдаланылған таспаларды жинап, алдағы жиын-терім науқанына әзірленіп жатыр.
Осы тұста шаруашылық қызметкері, Көкдала ауылының тұрғыны Секер Кәріпбаевамен тілдестік. Өзінің айтуынша, көктемнен бері осы қожалықта еңбек етіп келеді.
Мұндағы еңбекақы жақсы. Биылғы өнімнің шығымы да көңіл қуантады. Алдын ала болжам бойынша әр гектардан 50–60 тоннаға дейін пияз жинауға мүмкіндік бар. Қазір тамшылатып суару жүйесінде пайдаланылған таспаларды жинап жатырмыз. Көп ұзамай пияз қазу және жинау науқаны басталады, – дейді Секер Кәріпбаева.
Егіс алқабында Ескелді ауылдық округінің бас маманы Дурсун Дұзұғылымен де кездесіп, ауыл шаруашылығының қазіргі жай-күйі туралы пікірін білдік. Оның айтуынша, округтегі шаруашылықтардың басым бөлігі қауын-қарбыз, пияз және көкөніс өсірумен айналысады. Диқандар өндірген өнімдерін саудаға шығарып, тұрақты табыс тауып отыр.
Ауылдық округтің табиғи және жер жағдайы егін шаруашылығын дамытуға өте қолайлы. Соның арқасында жергілікті шаруалар қауын-қарбыз, пияз және басқа да көкөніс түрлерінен жақсы өнім алып келеді. Олардың еңбегін нәтижелі ету үшін қажетті қолдау көрсетіліп отыр, – дейді Ескелді ауылдық округінің бас маманы Дурсун Дұзұғылы.
Қараталдық диқандардың маңдай тері мен көп жылғы тәжірибесі өңірдегі көкөніс шаруашылығының дамуына серпін беріп келеді.
Қажет АНДАС
