Жаңа Конституция жобасындағы цифрлық ортаны реттеуге қатысты ұсыныстар азаматтардың жеке өмірі мен деректерін қорғаудың жаңа кепілі болмақ, – деп хабарлайды 7-su.kz ақпараттық порталы.
Конституциялық комиссияның 11-ші отырысында Алматы облысы мәслихатының төрағасы Қуат Байғожаев маңызды мәлімдеме жасады. Оның айтуынша, жаңа құжаттағы өзгерістер әсіресе халық тығыз қоныстанған және цифрландыру деңгейі жоғары Алматы өңірі үшін өте өзекті.
Алматы облысы бүгінде еліміздің экономикалық драйверіне айналып отыр. Өңірде іске асырылып жатқан «Alatau City» жобасы заманауи технологиялар мен цифрлық сервистердің орталығына айналады. Осы ретте азаматтардың виртуалды әлемдегі қауіпсіздігін қамтамасыз ету – мемлекеттің басты басымдығы.
Қуат Байғожаев цифрлық технологиялардың қоғамның ажырамас бөлігіне айналғанын, сондықтан азаматтардың осы саладағы құқығын конституциялық деңгейде бекіту уақыт талабы екенін атап өтті.
Жаңа Конституция жобасында азаматтар үшін маңызды мынадай мәселелер қамтылған:
-
Дербес деректердің қорғалуы: Әрбір адамның жеке мәліметтері заңсыз пайдаланудан қорғалады.
-
Хат-хабар алмасу құпиясы: Электронды коммуникация мен өзара жазысулардың қауіпсіздігіне кепілдік беріледі.
-
Цифрлық сенім: Мемлекеттік институттар мен цифрлық сервистер арасындағы байланыс ашық әрі қауіпсіз болады.
Спикердің пікірінше, бұл нормалардың Ата заңда көрініс табуы цифрлық қауіпсіздік саласындағы заңнаманың дамуына берік негіз қалайды. Бұл қарапайым халықтың күнделікті өмірде алаңсыз болуына және мемлекетке деген сенімінің артуына тікелей әсер етеді.
Комиссия мүшесі Конституция жобасының жан-жақты пысықталғанын мәлімдеді. Дайындық жұмыстарының аяқталуына байланысты құжатты бүкілхалықтық референдумға шығаруға толық негіз бар.
Айта кетейік, Алматы облысында 1 млн 500 мыңнан астам халық тұрады және бұл өңірдегі цифрлық белсенділік еліміздегі ең жоғары көрсеткіштердің бірі. Сондықтан жаңа нормалар облыс тұрғындарының құқықтық сауаттылығы мен қауіпсіздігін жаңа белеске көтереді.
