Қазақ халқында «Жақсының аты өлмейді, ғалымның хаты өлмейді» деген тағылымды сөз бар. Адамның ғұмыры шектеулі болғанымен, оның елге сіңірген еңбегі мен артында қалдырған ізгі істері ұрпақ жадында мәңгі сақталады. Сондай жандардың бірі – көпшіліктің құрметіне бөленіп, ел аузында «алтын қолды дәрігер» атанған Күлән Сейтайқызы еді.
Қаратал ауданына қарасты Алмалы ауылында ерекше әрі тағылымы мол шара өтті. Марқұм Күлән Сейтайқызы тұрған қасиетті қара шаңырақтың орнына ұрпақтары өз қаражаттары есебінен саялы бақ салып, ауыл тұрғындарының игілігіне ұсынды. Тұтас ауылдың қуанышына айналған игі істің мақсаты – өткенге тағзым, жақсының жарқын бейнесін ұлықтау.
Бүгінгі ашылған саялы бақ – сол халық құрметінің, перзенттік парыздың жарқын көрінісі. Бақ ішіндегі әрбір көшет, әрбір гүл мен ағаш Күлән ананың өмір жолын, оның елге жасаған қызметін еске салатындай. Бұл жер енді ауыл тұрғындарының тынығатын, балалардың шаттанып ойнайтын, үлкендердің өткенді еске алып, сыр шертетін сүйікті мекеніне айналмақ.
Күлән Әйнекова 1948 жылы Көпбірлік ауылында дүниеге келген. Бала кезінен еңбекқорлық пен жауапкершілікті серік еткен ол 1968 жылы Балқаш қаласындағы медицина училищесін «акушер мамандығы бойынша үздік тамамдайды. Еңбек жолын туған өңірінде бастап, Қапал мен Көпбірлік ауылдарында қызмет атқарады. Ал 1977 жылы «Байшегір» қой ұжымшарының орталығы болған Алмалы ауылында жаңадан ашылған ауылдық ауруханаға жұмысқа орналасып, өмірінің соңына дейін сол жерде абыроймен еңбек етеді.
Сол жылдары ауылдардың аудан орталығынан шалғай орналасуы, жол қатынасының қиындығы дәрігерлерге үлкен салмақ түсіретін. Қарлы боран мен жауынды күнге қарамастан, шақырту түскен жерге жетуге асығатын Күлән апа талай ананың аман-есен босануына көмектесіп, қаншама нәрестенің жарық дүниеге келуіне себепкер болды. Түн ұйқысын төрт бөліп, күн-түн демей қызмет атқарған жанның еңбегі ел жадында мәңгі сақталары сөзсіз.
Ауыл ақсақалдарының айтуынша, бүгінде өңірде өмір сүріп жатқан талай азаматтың кіндігін Күлән Сейтайқызы кескен. Сондықтан да ауыл тұрғындары оны бірнеше ұрпақтың өмір жолына ақ батасын берген аяулы ана ретінде құрметтейді.
Өкінішке қарай, өзгенің өміріне араша болып жүрген абзал жан небәрі 49 жасында дүниеден өтті. Алайда қысқа ғұмырында атқарған адал еңбегі мен жасаған жақсылығы оны халық жадында мәңгі қалдырды. Еңбегі еленіп, 1990 жылы КСРО Денсаулық сақтау министрлігінің Құрмет грамотасымен марапатталды. Сонымен қатар аудандық және облыстық денсаулық сақтау саласының көптеген Алғыс хатына ие болды.
Күлән Сейтайқызының ғұмыры адамға қызмет етудің, мамандыққа адал болудың және елге жанашырлық танытудың жарқын үлгісі болып қала бермек. Ал оның құрметіне ашылған саялы бақ жылдар өткен сайын жайқалып өсіп, абзал жанның есімі ел жадынан өшпейтіні анық.
Медет ЖҰМАБАЙ
