Қазақстанда азаматтардың жеке мәліметтерін сақтау мен қорғауды бақылау шаралары едәуір күшейтіледі, – деп хабарлайды 7-su.kz ақпараттық порталы.
Елімізде киберқауіпсіздік пен деректердің қауіпсіздігін қамтамасыз ету мақсатында ірі операторлардың арнайы тізілімі жасалады. Жасанды интеллект және цифрлық даму вице-министрі Досжан Мусалиевтің айтуынша, енді азаматтар туралы ауқымды ақпарат жинайтын мекемелер мемлекеттік органға өз қызметі жайлы міндетті түрде хабарлауға тиіс.
Заңнамаға «дербес деректер идентификаторы» ұғымы кірді. Енді адамның аты-жөні, ЖСН, жүз бейнесі және биометриялық векторлары осы санатқа жатады. Құпия ақпараттар сақталатын дерекқорларға кіру үшін қызметкерлерге биометриялық аутентификация міндеттеледі.
Ең маңызды жаңалықтың бірі – егер ақпарат сыртқа тарап кетсе, компаниялар бұл туралы мемлекетке ғана емес, зардап шеккен азаматтарға да хабарлауға міндеттелмек.
«Бұл азаматтардың үлкен көлемдегі дербес деректерімен жұмыс істейтін ұйымдарға көбірек көңіл бөлуге, сондай-ақ қосымша ұйымдастырушылық және техникалық қорғау шараларын белгілеуге мүмкіндік береді», – деді вице-министр.
Соңғы жылдары елімізде киберқауіпсіздік бойынша 648 жоспардан тыс тексеру жүргізілген. Оның нәтижесінде ұйымдастырушылық және техникалық бұзушылықтар анықталды. Тексерістер антивирустың жоқтығын, көп факторлы аутентификацияның қолданылмауын, қауіпсіздік жаңартуларының орнатылмауын көрсетті. Заң бұзған мекемелерге айыппұл салынды.
Сондай-ақ, бұл талаптар тек ірі ұйымдарға емес, шағын және орта бизнеске де таралады. Тізімге мынадай орындар киреді:
-
Сұлулық салондары мен фитнес-орталықтар
-
Жекеменшік клиникалар мен шағын қаржы ұйымдары
-
Білім беру орталықтары мен онлайн-платформалар
-
Дүкендер, туристік компаниялар мен компьютерлік клубтар
Жеке мәліметтердің таралып кетуі қаржылық алаяқтыққа, жеке өмірге қолсуғушылыққа әкеліп соғады. Деректерді қорғаудың жаңа стандарттары цифрлық кеңістіктегі қауіпсіздікті қамтамасыз етуге, азаматтардың өз құқықтарын қорғауға үлкен мүмкіндік береді. Жаңа ережелер киберқылмыспен күресуге және тұтынушылардың ұйымдарға деген сенімін арттыруға бағытталған.
