Қазақстанда вегетация кезеңі, суармалы су, егістік алқаптары, су ресурстары және Жетісу облысы диқандарының қажеттілігін өтеу бойынша атқарылған жұмыстар қорытындыланды, – деп хабарлайды 7-su.kz ақпарттық порталы.
Орталық коммуникациялар қызметі алаңында Қазақстан Республикасы Су ресурстары және ирригация министрлігінің Су ресурстарын реттеу, қорғау және пайдалану комитетінің төрағасы Сейілбек Нұрымбетов баспасөз мәслихатын өткізді. Ол биылғы дала жұмыстарының барысы мен шаруаларды тіршілік нәрімен қамтамасыз ету мақсатында қабылданған кешенді шараларды баяндады. Негізгі жоспар бойынша елімізде 1,2 млн гектар алқапқа 11 млрд текше метр шамасында ылғал беру көзделген болатын. Су шаруашылығы ұйымдары диқандармен 1,1 млн гектарға жуық жерге 11,4 млрд текше метр көлемінде су жеткізуге арналған 42 мыңға жуық келісімшарт жасасты. Жедел мәліметтерге сүйенсек, қазіргі сәтке дейін 1,1 млн гектар егістікке нақты 11,1 млрд текше метр суармалы су жіберілді.
Аймақтар бойынша бөлініске назар салсақ, Қызылорда облысында 122 мың гектарға 3,3 млрд текше метр, Түркістан облысында 412 мың гектар аумаққа 3,9 млрд текше метр ылғал жөнелтілді. Алматы облысындағы 124 мың гектар алқапқа 1,5 млрд текше метр берілсе, Жетісу облысының 146 мың гектар жері 1,2 млрд текше метр тіршілік нәрімен қамтылды. Жамбыл өңірінде 72 мың гектарға 714 млн текше метр, қалған облыстардағы 169 мың гектарға 414 млн текше метр су бөлінді. Бүгінде ірі су қоймаларында 57,9 млрд текше метр қор жинақталған, яғни олар 67 пайызға толып тұр. Қолда бар қор гидрологиялық тұрақтылықты сақтаумен қатар экологиялық тазалыққа да жетеді.
Маусым алдында су көлемі жан-жақты сараланып, су пайдалану лимиттері нақтыланды. Соның нәтижесінде көп ылғал қажет ететін күріш алқаптары 21,6 мың гектарға қысқартылып, 100,5 мың гектардан 78,9 мың гектарға дейін шектелді.
Жиында Сейілбек Нұрымбетов атқарылған жаңашылдықтар жайында:
«Бас прокуратурамен бірлесіп қабылданған судың «қара нарығына» қарсы іс-қимыл жөніндегі Жол картасы аясында белгілі бір нәтижелерге қол жеткізілді. Алғаш рет «Қазсушар» РМК мен тұтынушылар арасындағы шарттық қатынастар цифрландырылып, қолма-қол есеп айырысу жойылды. 2027 жылға арналған жоспар бойынша «Тұран-Су», «Алматыоблсушар» және басқа да 43 субъектінің суару жүйелері мен шарттық қатынастарын цифрландыру көзделіп отыр. Жалпы, алдын ала қабылданған ұйымдастыру шараларының, трансшекаралық су нысандары бойынша уақытылы жүргізілген халықаралық өзара іс-қимылдың, су беру режимдерін жедел реттеудің және су пайдалануды бақылаудың күшейтілуінің арқасында вегетация кезеңі штаттық режимде өтті», – деді.
Мемлекет тарапынан қолға алынған цифрландыру тетіктері көлеңкелі мәмілелерді тыйып, диқандарға судың әділ әрі ашық үлестірілуін қамтамасыз етуде. Қолма-қол есеп айырысудан арылып, онлайн төлемге көшу жүйенің сенімділігін арттырды. Мұндай оң өзгерістер аграрлық саланы өркендетіп, азық-түлік қауіпсіздігін нығайтуға мықты серпін береді.
