Жаңа оқу жылынан бастап Қазақстанның бастауыш сынып оқушылары ТЖБ мен БЖБ тапсырмайды, – деп хабарлайды 7-su.kz ақпараттық порталы.
Оқу-ағарту министрлігі қоғамда ұзақ уақыт бойы қызу пікірталас тудырған жиынтық бағалау жүйесіне қатысты түпкілікті шешім шығарды. Сарапшылар мен мамандар бұл форматының бастауыш буында тиімсіз екенін алға тартқан еді. Енді 1-4-сынып оқушылары күзелу мен эмоциялық қысымнан арылып, білімді тереңірек меңгеруге мүмкіндік алады. Осылайша, білім саласының жауапты өкілдері оқушыларға түсетін психологиялық жүктемені азайтуды көздеп отыр.
Бұл өзгеріске ата-аналар қауымы оң баға беріп жатыр. Мәселен, төрт баланың анасы Гүлнар Омарова жиынтық бағалау оқушылардың алған білімінің нақты деңгейін көрсетпейді деген пікірде. Ата-ананың айтуынша, бағалаудың бұл түрі балаларды білім алуға емес, дайын жауапты көшіріп алуға баулыған. Оқушылар ғаламтордан дайын үлгілерді тауып алып, жоғары балл жинайды. Алайда мектеп аяқтар шақта негізгі білімнің ақсап тұрғаны байқалып, репетиторлардың көмегіне жүгінуге мәжбүр болады.
Оқу-ағарту министрлігі де бұл мәселені ішінара мойындады. Ы. Алтынсарин атындағы Ұлттық білім академиясының аға ғылыми қызметкері Раушан Бапишева арнайы талдау жұмыстары жүргізілгенін атап өтті. Зерттеу нәтижесі көрсеткендей, бастауыш сыныптардағы БЖБ мен ТЖБ балалардың шынайы қабілетін толық айқындай алмайды. Керісінше, кішкентай оқушыларға артық академиялық және эмоциялық ауыртпалық түсіреді.
Дегенмен реформа тек бастауыш мектепті қамтиды. 5-11-сынып оқушылары үшін БЖБ мен ТЖБ тапсыру форматы сақталады. Орта және жоғары сыныптарда бұл жүйе әлі де білім деңгейін тексерудің негізгі құралы ретінде қала береді.
Бұл жаңалық қоғамда қолдау тапқанымен, тәжірибелі мұғалімдер мен мамандар тарапынан сынға да ұшырады. Парламент Мәжілісінің бұрынғы депутаты Ирина Смирнова бұл жүйені кезінде ойлап тапқандар мен енгізгендер жауапқа тартылуы тиіс деп есептейді. Оның сөзінше, БЖБ мен ТЖБ жүйесін енгізуге, мұғалімдерді қайта оқытуға бюджеттен 10-15 млрд теңгеден астам орасан зор қаржы жұмсалған. Қазіргі таңда бұл инновацияның сәтсіз болғанын мойындау жеткіліксіз, тиімсіз реформа ұсынған жауапты тұлғалар халық алдында жауап беруі керек.
Біле жүрген абзал: БЖБ – бөлім бойынша жиынтық бағалау, ол оқу бағдарламасының белгілі бір тарауы аяқталғанда өткізіледі. ТЖБ – тоқсан бойынша жиынтық бағалау, тоқсан соңында өтілген барлық материалды қорытындылау үшін алынады.
