Өмір өркендеген сайын тұрмысымыз да мағыналы жаққа беттейді деп ойлаймыз. Өкінішке қарай, рухани байлығымыз молайған сайын бүлдіретін бәлекеттердің де саны артып, қатары көбейіп келеді. Келеңсіз қылықтармен қанша күрескенмен де оны түбегейлі шешудің жолын таппай санамыз сан-саққа бөлініп жүр.
Сол қоғам дертіне айналған құбылыстың бірі – электронды шылым болашағымызды ойрандап жатыр. Көшедегі жүргіншілердің денінен сол затты көресің. Көресің де көңілің құлазиды. Үлкені де, кішісі де бірреттік шылымды жарыса сатып алуда. Оларды шылымның дәмі мен әдемі сыртқы қабы еліктіріп жүргенін білеміз.
Электронды шылым темекі секілді ащы емес, құрамына әртүрлі жемістің дәмі шығатын еліктіргіш заттар қосылған. Бағасы да тым қымбат емес. Дүкендерде кішкентай балаға сатуға тыйым салынса да мектеп жанындағы дүкен сөрелерінде самсап тұр. Оны жасөспірімдердің таласа сатып алып, тұтынғанына мәз болып жүргенін көреміз.
Балалардың осы бір еліктіргішке қалай бейімделгенін ата-аналары неге байқамайды дейтін шығарсыз. Өндірушілер шылымның қабын шырынның бөтелкесіне ұқсатып жасаған. Сырт көзге түтікшемен шырын ішіп тұрғандай көрінеді. Түсінген адамға болашағымыз осылай быт-шыт болып жатыр. Ата-аналар таңды кешке жалғап балаларым мектепте тамақ ішсін деп аузындағысын жырып береді. Ал балалар ата-ананың үмітін ақтаудың орнына әлдекімдердің ақшақұмарлығының құрбаны болуда.
«Біреу туберкулез ауруына шалдығыпты» десе жағамызды ұстаушы едік. Мына бәлекет одан да салмақты дертке ұшырататынын дәрігерлер дәлелдеп, дабыл қағып жатыр. Өкініштісі, қоғам бұл дертпен күресудің жолын таппай келеді. Осындай жағдайдан туындайтын мәселелерге мектепті кінәлайтындар да көп. Дегенмен, бала бірінші тәрбиені отбасынан алады. Сондықтан ата-аналар балаларының тұтынған заты, қолданған амалдарын қадағалап, зиянды әрекеттерге бейім болса оның жаман тұстарын түсіндіріп, балаларды қатерлі жолдан арашалауға атсалысқаны жөн. Әйтпесе ертең өкініп қалуымыз мүмкін.
Камила Сергеева,
І. Жансүгіров атындағы Жетісу университеті журналистика
мамандығының 4-курс студенті
Фото: kazpravda.kz
