Қазір адамдардың қолынан кітаптан гөрі телефонды жиі көреміз. Аз ғана бос уақыт тапсақ, әлеуметтік желіні парақтауға асығамыз. Ал кітап оқуға келгенде «уақыт жоқ» деп ақталамыз. Шын мәнінде уақыт азайған жоқ, өзгергені – біздің таңдауымыз.
Бұл – бүгінгі қоғамның ең өзекті мәселелерінің бірі. Өйткені кітаптан алыстаған қоғам біртіндеп терең ойлау дағдысынан да алыстайды. Кітап адамның таным көкжиегін кеңейтіп, сыни ойлау қабілетін қалыптастырады, рухани дүниесін байытады. Сондықтан Мемлекет басшысы Қасым-Жомарт Тоқаевтың: «Озық ойлы ұлт болудың ең төте жолы – кітап оқу. Сондықтан кітап оқу мәдениетін қоғамда барынша орнықтыруымыз керек» деген пікірі кездейсоқ айтылған жоқ. Президенттің бұл ұстанымы кітаптың адам тәрбиесіндегі ғана емес, қоғамдық сананы қалыптастыру мен мемлекеттің зияткерлік әлеуетін арттырудағы айрықша рөлін айқын көрсетеді.
Осы идеяның нақты жалғасы ретінде Достық үйінде «ЭТНОКІТАПХАНА – РУХАНИ КЕЛІСІМНІҢ ЖАҢА АЛАҢЫ» атты этнокітапхана ашылды. Бұл – кітапты қоғамдық келісімнің, мәдени сабақтастықтың және рухани тәрбиенің өзегіне айналдыруға бағытталған маңызды бастама.
Жаңа кітапхана қорында қазақ әдебиетінің классикалық мұралары, әлем әдебиетінің таңдаулы шығармалары, Қазақстан этностары қаламгерлерінің еңбектері, түрлі этностардың тілдеріндегі кітаптар, сөздіктер, тарихи және ғылыми-әдістемелік әдебиеттер, балалар басылымдары жинақталған. Мың жарымға жуық кітаптан тұратын бұл қор – тек ақпарат көзі емес, қоғамдық сананы қалыптастыратын рухани қазына.
Этнокітапхананың ашылу салтанатында сөз сөйлеген «Қоғамдық келісім» коммуналдық мемлекеттік мекемесінің директоры Айдос Игембай бұл жобаның негізгі мақсаты – кітапқа деген қызығушылықты арттырумен қатар түрлі этностардың мәдени мұрасын дәріптеу, қоғамдық келісім мен жалпыұлттық бірлік құндылықтарын әдебиет арқылы нығайту екенін атап өтті. Оның айтуынша, кітапхана жастардың ізденісіне жол ашатын, мәдениеттердің өзара үндесуіне ықпал ететін маңызды рухани орталыққа айналуға тиіс.
Мұнан соң сөз алған облыстық ардагерлер ұйымының төрағасы Ермек Келемсейіт, облыс әкімдігінің Әдеп жөніндегі уәкілі Ғабит Тұрсынбай, сонымен қатар өңірдің зиялы қауым өкілдері де жаңа бастаманың мәніне тоқталды. Олар кітаптың қай кезеңде де ұлт тәрбиесінің алтын қазығы болып қала беретінін айтып, этнокітапхананың жас ұрпақтың рухани дүниесін байытуға, ел ішіндегі өзара түсіністік пен татулықты нығайтуға қосар үлесі зор екеніне сенім білдірді.
Шара аясында өңірдің этномәдени келбетін танытатын Этнокарта жобасының таныстырылуы да көпшілік назарын аударды. Онда облыстың этникалық құрамы, этномәдени бірлестіктердің қызметі, олардың орналасуы мен негізгі бағыттары туралы мәліметтер жүйеленген. Бұл жоба өңірдің қоғамдық келісім тәжірибесін танытатын маңызды ақпараттық қор ретінде де құнды.
Қазіргі таңда қоғамға жаңа ғимараттардан бұрын жаңа ойлау мәдениеті қажет. Ал жаңа ойлау мәдениеті кітаптан басталады. Өйткені кітап оқыған адам салыстырады, саралайды, өзгеге құрметпен қарайды. Мұндай қасиеттер қоғамдық келісімнің де, ұлттық бірліктің де берік негізін қалайды.
«ЭТНОКІТАПХАНА – РУХАНИ КЕЛІСІМНІҢ ЖАҢА АЛАҢЫ» – Президент көтерген кітап оқу мәдениетін қалыптастыру бастамасының өңірдегі нақты көрінісі, әдебиет арқылы адамдарды жақындастыратын, қоғамдық келісімді нығайтатын жаңа рухани кеңістік.
Сарби ӘЙТЕНОВА
