Кербұлақ ауданының әкімі Қаспан ауылдық округіне қарасты Көксай ауылына жұмыс сапарымен барып, салынып жатқан заманауи мектептің құрылыс барысымен танысты.
Сапар барысында аудан әкімі мектеп ғимаратының құрылыс сапасын, спорт залы мен футбол алаңының жағдайын, сондай-ақ нысан аумағын абаттандыру жұмыстарының орындалу барысын зерделеді.
Жұмыс сапары кезінде құрылыс жұмыстарының сапасына ерекше назар аударылып, анықталған кемшіліктерді жою жөнінде жауапты мердігерлерге нақты тапсырмалар берілді. Сонымен қатар ауылдық округ әкімі мен жауапты бөлімдерге құрылыс барысын тұрақты бақылауда ұстап, нысанды белгіленген мерзімде әрі сапалы аяқтау міндеті жүктелді.
Көксай ауылындағы жаңа мектептің бой көтеруі – елді мекеннің әлеуметтік инфрақұрылымын дамытудағы маңызды қадам. Заманауи білім ордасының пайдалануға берілуі ауыл балалары үшін қолайлы білім алуға мүмкіндік жасап, олардың сапалы білім мен жан-жақты дамуына жағдай туғызбақ.
Аудан басшылығы ауылдық аумақтарды дамыту, елді мекендерді абаттандыру және тұрғындарға қолайлы жағдай жасау бағытындағы жұмыстарды тұрақты назарда ұстап келеді.
Кербұлақ ауданы әкімдігінің баспасөз қызметі
