Жетісу өңірінде автокөліктердің өртену оқиғаларының жиілеуіне байланысты мамандар қауіпсіздік талаптарын қатаң сақтауды ескертеді, – деп хабарлайды 7-su.kz ақпараттық порталы.
Қаратал ауданының төтенше жағдайлар бөлімі өкілдерінің мәлімдеуінше, жеңіл көліктердегі тілсіз жау көбіне жүргізушілердің салғырттығынан және шұғыл жағдайда дұрыс әрекет етпеуінен орын алады. Сала мамандары өрт қауіпсіздігі ережелерін сақтау әрбір көлік иесінің басты міндеті екенін алға тартады. Темір тұлпардағы ақаулықты уақытылы анықтап, алдын алу шараларын тез арада қабылдау үлкен қайғылы жағдайлардың алдын алуға септігін тигізеді.
Автокөліктегі өрттің шығуына бірнеше негізгі факторлар себеп болады. Солардың ішінде ең жиі кездесетіні – электр сымдарының қысқа тұйықталуы. Тозған немесе дұрыс оқшауланбаған сымдар, сапасыз орнатылған қосымша құрылғылар ұшқын шығарып, тез тұтануға әкеледі. Екінші қауіпті себеп – жанармай жүйесіндегі ақаулар. Уақыт өте келе тозатын жанармай шлангілері жарылып, бензин булары ыстық қозғалтқышқа тиген сәтте өрт бірден лап ете түседі. Сондай-ақ қазіргі көліктердің салонындағы синтетикалық материалдар жанған кезде өте улы газ бөлетінін ұмытпаған жөн.
Көлік қозғалыста келе жатқанда күйік иісі немесе капот астынан түтін байқалса, жүргізуші бірден көлікті жол шетіне тоқтатып, қозғалтқышты өшіруі тиіс. Жолаушыларды қауіпсіз жерге шығарған соң, «101» немесе «112» шұғыл қызметіне хабарласу қажет. Қозғалтқыш бөлігіндегі өртті сөндіру кезінде суды қолдануға мүлдем болмайды, бұл жанармайдың жан-жаққа жайылуына әкеп соғады. Мұндай сәтте көліктегі өрт сөндіргіш құралын пайдаланған абзал.
Төтенше жағдайлардың алдын алу үшін автокөліктің техникалық жағдайын үнемі тексеріп отыру қажет. Электр жүйесін жөндеуді тек білікті мамандарға тапсырған жөн. Әрбір көлікте жарамдылық мерзімі өтпеген өрт сөндіргіштің болуы – ықтимал қауіптен қорғайтын негізгі қалқан. Тұрғындардың жауапкершілігі мен сақтық шаралары жолдардағы қауіпсіздікті қамтамасыз етудің басты кепілі.
