Қазақстан халқы Ассамблеясының 30 жылдығына орай Жетісу облысындағы Көксу ауданы Балпық би ауылдық мәдениет үйінде өзге ұлт өкілдерімен арнайы кездесу өтті. Іс-шара «Елдесу және татуласу» республикалық жобасын жүзеге асыруға бағытталған.
Бағдарламаның басты мақсаты – ел халықтарының рухани бірлігі мен достығын нығайту және құрметтеу, сондай-ақ, орнықтылықты сақтап, біртұтас ел ретінде бір шаңырақ астында тату-тәтті өмір сүруді кеңінен дәріптеу. Талдықорғандағы Достық үйі «Қоғамдық келісім» мемлекеттік мекемесінің ұйымдастыруымен өткен шараға ардагерлер, Ассамблея мүшелері, аудан тұрғындары мен жастары қатысты.
Кездесуде аймақтағы «Нахичиван» Әзірбайжан ұлттық-мәдени орталығының төрағасы, кәсіпкер Фахреддин Магеррамов өткен жылдағы атқарылған істерді қорытындылап, ағымдағы жылдың жоба-жоспарларымен таныстырды. Құрылғанына 30 жылдан асқан мәдени бірлестік бүгінде ұлттық салт-дәстүрді кеңінен насихаттап, ұлттар арасындағы береке-бірлікті бекемдеп, өңірдің өркендеуіне айтарлықтай үлес қосып келеді.
Жиында Көксу аудандық Ақсақалдар кеңесінің төрағасы Сайлаубай Бәзілов «Отбасы құндылықтары – бала тәрбиесінің қайнар көзі» тақырыбында сөз сөйлеп, ұрпақ тәрбиеу туралы құнды ой-пікірлерімен бөлісті.
Осыдан соң І.Жансүгіров атындағы Жетісу университеті құқық кафедрасының оқытушы-дәріскері, кәсіби медиатор Бақытгүл Кененсарықызы аудан тұрғындарына құқықтық тегін кеңес беріп, басқа да сауалдарға жауап берді.
– Кездесу сәтті әрі табысты болды деп санаймыз. Өйткені, «Елдесу және татуласу» жобасы – татулық тірегі. Шарада аймақ тұрғындары білікті мамандармен отбасы құндылықтары, салт-дәстүр сабақтастығын жаңғырту және басқа да маңызды мәселелерге қатысты ашық пікір алмасты. Осы орайда олар көкейде жүрген көп сұрақтарының біразына жауап алғаны анық, – дейді ұйымдастырушылар.
Айта кетейік, Үкіметтің 2024 жылғы 24 қазандағы қаулысымен «Бірлік пен келісімнің 30 жылы» Қазақстан халқы Ассамблеясының 30 жылдығын ұйымдастыру және өткізу жөніндегі іс-шаралар жоспары бекітілген болатын. Ол іс-жоспарда бірқатар маңызды шаралар қамтылмақ.
Дәлірек айтқанда, ҚХА-ның ХХХІV мерекелік сессиясын, Мемлекеттік және қоғамдық наградаларды, «Мәдениетаралық және этносаралық бірлікті нығайту аясындағы мәдениет және өнер саласындағы үздік жұмыстары үшін» және «Мәдениетаралық және этносаралық бірлікті нығайту бойынша әдебиет және журналистика саласындағы үздік жұмыстары үшін» сыйлықтарын табыстау, ҚХА Кеңесінің кеңейтілген отырысын өткізу, өңірлік жоспарларды әзірлеу және іске асыру, «Ассамблея жастары» РҚБ-ның «Бірлік пен ынтымақтастыққа 30 жыл» қайырымдылық акциясы, «Жастар-Life» және «Елім менің» жобалары, «Сыр елі – достық мекені», «Бірлік-Единство.kz» республикалық жастар форумы, «Рақмет, Жер ана!» экологиялық акциясы, Францияның Париж қаласындағы ЮНЕСКО штаб-пәтерінде ҚХА қызметінің таныстырылымын ұйымдастыру сынды іс-шараларды өткізу көзделген. Ел бірлігін еселеп, ұйым беделін арттыра түсетін бұл бастамалар кемінде 1,5 млн адамды қамтиды деп жоспарланып отыр.
Айдын КӘЛІМХАН
