1 қыркүйектен бастап бастауыш сынып оқушыларының білімін бағалау жүйесі түбегейлі өзгереді, – деп хабарлайды 7-su.kz ақпараттық порталы.
Ресми мәліметке сүйенсек, 1-4 сыныптар аралығында бөлім бойынша жиынтық бағалау (БЖБ) мен тоқсандық жиынтық бағалау (ТЖБ) толығымен тоқтатылады. Оның орнына оқушылардың білім деңгейін анықтайтын дәстүрлі әрі тиімді жаңа бақылау нысандары енгізілмек.
Бастауыш сыныптардағы қазіргі бағалау жүйесінің тиімділігін Ы. Алтынсарин атындағы Ұлттық білім академиясының мамандары жан-жақты зерттеді. Сарапшылар ата-аналар мен педагогтердің ұсыныстарын, білім беру ұйымдарының тәжірибесін және оқушылардың жас ерекшеліктерін ескере отырып, терең талдау жүргізді.
Зерттеу нәтижесі көрсеткендей, БЖБ мен ТЖБ форматы балалардың білім деңгейін әрқашан объективті көрсете бермейді. Керісінше, бұл жүйе кішкентай оқушыларға психологиялық және эмоционалдық салмақ салып, сабаққа деген ынтасын төмендетеді.
Жаңа оқу жылынан бастап балалардың білімді меңгеру деңгейі мынадай дәстүрлі тапсырмалар арқылы тексеріледі:
-
Диктант пен мазмұндама жазу;
-
Бақылау жұмыстары;
-
Практикалық және шығармашылық тапсырмалар.
Бұл тәсіл балалардың оқу және жазу сауаттылығын арттырып, функционалдық сауаттылығы мен сыни ойлау қабілетін дамытуға мүмкіндік береді.
Оқу-ағарту министрі Жұлдыз Сүлейменованың айтуынша, қолданыстағы жүйеде ТЖБ нәтижесі тоқсандық бағаның 50 пайыз үлесін алады. Егер оқушы тоқсан бойы жақсы оқып, сабаққа белсене қатысса да, соңғы сынақта сүрінсе, жалпы бағасы төмендеп кететін. Бастауыш мектептің басты мақсаты – баланың білімге деген қызығушылығын арттыру болғандықтан, бұл әділетсіздік түзетіледі.
Жаңа жүйенің тағы бір оң сипаты – мұғалімдерді артық қағазбастылықтан арылту. Статистикаға сүйенсек, бір бастауыш сынып мұғалімі БЖБ мен ТЖБ тапсырмаларын басып шығару үшін жылына шамамен 4 мың ақ парақ жұмсайды екен. Ал бұл жұмыстарды тексеруге мұғалімнің 112 сағатқа жуық уақыты кетеді.
Жаңа өзгерістер ұстаздардың уақытын үнемдеп, назарды сапалы білім беруге бағыттауға жол ашады. Астанада өткен республикалық жиында мұғалімдердің басым бөлігі бұл бастаманы толық қолдады. Қазіргі уақытта бағалау тәртібіне қатысты №125 бұйрыққа тиісті түзетулер енгізілуде.
