Елімізде eGov 3.0 жаңа нұсқасы іске қосылып, мемлекеттік қызметтерді алу процесі барынша қарапайым форматқа көшірілді, – деп хабарлайды 7-su.kz ақпараттық порталы.
Премьер-министрдің орынбасары – Жасанды интеллект және цифрлық даму министрі Жаслан Мәдиев Үкімет отырысында eGov порталының жаңарғанын мәлімдеді. QazTech платформасында әзірленген eGov 3.0 цифрлық жүйесі қолданушылар үшін бюрократияны азайтып, талаптар мен қадамдар санын 15-20%-ға дейін қысқартты.
Бұған дейін портал өзінің технологиялық шегінде жұмыс істеп келген. Жүйені жаңғырту цифрлық сауаттылықты арттыруға әрі азаматтардың уақытын үнемдеуге бағытталған.
Жаңа eGov 3.0 жүйесінде азаматтарға кері байланыс қалдыру мүмкіндігі берілді. Енді кез келген тұрғын мемлекеттік қызметтерді қалай ыңғайлы етуге болатыны жөнінде өз ұсынысын жібере алады. Үздік идеялар порталды одан әрі дамыту барысында ескеріледі.
Қазіргі таңда Қазақстан БҰҰ-ның Электрондық үкіметті дамыту индексінде 193 елдің ішінен 24-орында тұр. Компьютерлік нұсқадан басталған цифрлық трансформация мобильді қосымшаға, кейін 1414 AI колл-орталығына дейін кеңейді.
Цифрлық саладағы басты жаңалықтың бірі – интеллектуалды ассистент eGov GPT іске қосылуы. Бұл жүйе азаматтардың өмірлік жағдайларына қарай қызметтерді өздігінен таңдап береді.
eGov GPT көмекшісінің артықшылықтары:
-
Өтінішті автоматты түрде дайындау. Азаматқа мемлекеттік органдарды іздеп, бюрократиялық құжаттарды жинаудың қажеті жоқ.
-
Сұранысты қарапайым тілде қабылдау. Жүйеге «баламды мектепке бергім келеді» немесе «үйге тіркелу керек» деп жазсаңыз жеткілікті.
-
Пайдаланудың жеңілдігі. Жасанды интеллект қажетті қызметті анықтап, нәтижесіне дейін орындайды.
