Мирас Нұрғазы Сарқан қаласындағы қосымша білім беру мекемесі «Балалар шығармашылық үйінің» өнерлі, талантты оқушыларының бірі. Өнерге деген құштарлығы 5 жасынан оянған. Ол фортепианода емін-еркін ойнап, тыңдарманын үйіріп әкететін қабілетке ие. Оны достары, ұстаздары мақтан тұтады.
Мұғалімдері Мирастың музыкаға деген махаббаты мен ынтасы ерекше екенін, аспапта ойнауды жетік меңгеріп, сан түрлі шығармаларды жоғары деңгейде орындайтынын, музыка арқылы өз эмоцияларын жеткізе алатынын айтады. Сонымен қатар, жаттығу барысында табандылық және шыдамдылықпен күрделі шығармаларды меңгеруге ерекше күш салатынын, тың дүниелерді үйренуге қызығушылық танытып, репертуарын әрдайым кеңейтіп отыратынын тілге тиек етеді.
Бүгінде жас өрен Халықаралық «Жас талант» байқауында аспапта ойнау бойынша ІІІ орын, республикалық «Ұлы Дала ұландары» байқауында бас жүлде, республикалық «Жетісу жұлдыздары» байқауында бас жүлде, республикалық «Жырлайды жүрек» байқауында бас жүлде, республикалық «Тәуелсіз елдің ұрпақтары байқауында ІІ орын, облыстық «Жетісу жұлдыздары» байқауында ІІІ орын, аудандық «Жетісу жұлдыздары» байқауында аспапта ойнау бойынша Бас жүлде иегері атанған.
Мирас Ильясұлын музыка саласында зор болашағы бар жас талант деп сеніммен айтуға болады. Оның жауапкершілігі мен талпынысы үлкен жетістіктерге жеткізетіні сөзсіз.
Медет ЖҰМАБАЙ
